Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,001 Autor: Giraut de Bornelh Gènere: Canso Número: XIV

 

A be chantar

I	1	A be chantar
		Conven amars
		E locs e grazirs e sazos ;
		Mas, s’eu agues dels catre·ls dos,
	5	No cut ja·ls altres esperes.
		Que·l locs me dona joi ades
		E la sazos, desqu’eu sui gais,
		Que ges lo tems, can l’erba nais,
		Si be se gensa folh’e flors,
	10	Tan no m’aiud en mo chantar
		Com precs e grazirs de senhors.
II		E per amar
		Fo ja chantars
		Grazitz e pretz prezatz pels pros
	15	E fo que sola sospeissos,
		Ses altre plus c’om i cudes,
		Ensenhava com s’enanses
		Vas totz sos benestars d’eslais
		E, que·s mezes en mans assais,
	20	Com li cregues pretz e valors
		E que·s chauzis de meschabar
		E·lh fos vils senhorils onors.
III		Era no par
		Que chastiars
	25	Me valgues ni clams ni tensos ?
		Pero no cre c’anc Amors fos
		Plus fina, s’amadors trobes ;
		Que qui per drech la razones,
		Ades se melhur’e val mais ?
	30	C’aissi com par fin’als verais,
		Sembla trefan’als trichadors
		E lor engan fa·l nom chamjar ;
		Que, pos falh, non es fin’Amors.
IV		De chastiar
	35	Me sui tan pars ;
		Que pro vetz n’ estauc consiros,
		Car vei c’ab ponher d’esperos
		No posc tan far que joi cobres.
		Pero, si sos dichs averes
	40	Mos Bels-Senher, l’ir’e l’esmais
		Qu’eu n’ai sofert, me fora jais
		E fors’e valors e socors
		E deuria s’en plus cochar,
		C’al no deman ni·n volh d’alhors.
V	45	E s’eu d’afar
		Li fos avars
		Don m’agues mandat ni somos,
		Assatz l’aportera razos
		Que ja convens no m’atendes ;
	50	Mas s’eu li sui verais, penses
		Si·s tanh que·s volva ni·s biais !
		Que la bona speransa·m pais
		E m’acompanh’ab chantadors
		E m’a dat solatz en trobar,
	55	Don m’era toltz, cobrar de cors.
VI		E ges d’avar
		No·m par afars,
		Desque trebalhs ni messios
		No·m tol qu’eu no sia joios ;
	60	C’anc no·m parec que ben anes
		Celui cui jois non agrades
		C’anc sens ni poders que joi bais
		No m’agradet ni no m’atrais
		Cobeitatz n’irada ricors.
	65	E qui que s’apel trop pensar
		Saber, eu dic c’ans es folors.
VII		A mercear
		Tanh mercears
		E franquez’als francs amoros
	70	E contr’als sobrers orgolhos
		Orgolhs e mals, que, si·s gardes
		Domn’al traspas, ans que·l passes,
		Ja vils ni sobrers ni savais
		No·lh plagra ; car no·lh tanh s’apais
	75	En tal obra don dezonors
		Li remazes, s’a razonar
		La n’aven, entrels amadors.
VIII		Senher Sobre-Totz, de colors
		Son li drap, e qui·ls sap triar,
	80	Falh, si compra los sordeiors.