Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,049 Autor: Giraut de Bornelh Gènere: Canso Número: XIX

 

No·m platz chans de rossinhol

I	1	No·m platz chans de rossinhol.
		Tan ai mo cor morn e trist !
		E pero si·m meravilh,
		Car no m’alegret abrils ;
	5	C’anc mais no fo negus ans
		De joi no·m dones dos tans.
		Mas ogan no·m platz la flors
		Ni·l fruchs del ram no m’agrada.
II		Morir me faran de dol
	10	Ist messatger que m’an quist.
		Ai ! car se saubesson ilh
		Com sai·m valgr’us paucs cortils
		Mais que lai us palais grans !
		Trop m’es lor solatz pezans
	15	E parra me dezonors,
		S’ab lor torn en m’encontrada.
III		Pauc s’ave d’aisso que sol,
		E no cre c’anc mais fos vist
		C’om vas sa terra s’eissilh ;
	20	Mas me es salvatg’e vils
		E·l repairars m’es afans !
		Peitz trac on plus lai m’enans
		Si que vergonh’e paors
		M’en dobla quega vegada.
IV	25	Qui m’o lauza, be no·m vol,
		E tu, flac cor, com volguist
		Que tan clar’amors roïlh,
		Anc no·i fezist que gentils ;
		C’anc cors de dos fis amans
	30	No vi om melhs d’us semblans.
		Mas cor que·t sobres Amors,
		Tu l’as er’apoderada !
V		Ja per aisso no m’acol,
		S’eu lai vauc, celha ni cist,
	35	Que del tornar m’avolpilh ?
		C’us jois sobresenhorils,
		On estai ferms mos talans,
		Es, tals, per qu’eu no balans,
		Don no·m pot lonhar valors,
	40	Si·m veni’en plana bada.
VI		Mas pero pel fort lassol
		De la man ab que·m prezist
		Velh la noch e m’estendilh
		E no t’aturs ni t’apils ! —
	45	Bela domna benestans,
		Cest anars no·m sia dans ;
		Quez eu tornarai de cors,
		E vos no·m siatz chamjada !
VII		Anc pairis contra filhol
	50	No fetz tal falha, per Crist,
		Ni paire contra so filh
		De lai on s’abriva·l Nils
		Tro sai on sols es colgans ;
		Per que deu esser mos chans
	55	Sobrels autres chantadors
		Per vos, domna, c’ai amada !
VIII		Era no·m platz chans ni flors
		Per vos, domna, c’ai laissada.