Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Codi: 451,001=293,006 Autor: Uc Catola, Marcabru Gènere: Tenso Número: VI

 

Amics Marchabrun, car digam

I	1	Amic(s) Marchabrun, car digam
		Un vers d'Amor, que per cor am
		Q'a l'hora qe nos partiram
		En sia loing lo chanz auziz.
II	5	Ugo Catola, er fazam,
		Mas de faus' amistat me clam,
		Q'anc pos la serps baisset lo ram
		No foron tant enganairiz.
III		Marcabrun, ço no m'es pas bon
	10	Qe d'Amor digaz si ben non ;
		Per zo·us en mou e[u] la tenson,
		Qe d'Amor fui naz e noiriz.
IV		Catola, non entenz razon,
		Non saps d'Amor cum trais Samson?
	15	Vos cuidaz e·ill autre bricon
		Qe tot sia vers quant vos diz.
V		Marcabrun, no·s troban auctor
		De Sanso·l fort e de s(a)' uxor
		Q'ela n'avia ostat s'amor
	20	A l'or[a] que ce fo deliz.
VI		Catola, qar a sordejor
		La det e la tolc al meillor,
		Lo dia perdet sa valor,
		Qe·l seus fo per l'estraing traïz.
VII	25	Marcabrun, si cum declinaz
		Qu'Amors si' ab engan mesclaz,
		Dunc es lo almosna pechaz,
		La cima devers la raïz !
VIII		Catola, l'Amors dont parlaz
	30	Camja cubertament los daz,
		Aprop lo bon lanz vos gardaz,
		Ço diz Salomons e Daviz.
IX		Marcabrun, amistaz dechai,
		Car a trobat Joven savai ;
	35	Eu n'ai al cor ir' et esclai,
		Qar l'en a levaz tan laiz criz.
X		Catola, Ovides mostra chai
		E l’ambladura o retrai
		Que non soana brun ni bai,
	40	Anz se trai plus aus achaïz.
XI		Marchabrun, anc non cuit t'ames
		L'Amors, ves cui es tant engres,
		Ni no fo anc res meinz prezes
		D'aitals joglars esbaluiz.
XII	45	Catola, anc de ren non fo pres
		Un pas, que tost no s'en loignes,
		Et enquer s'en loingna ades,
		E fera, tro seaz feniz.
XIII		Mar[ca]brun, quant sui las e·m duoill,
	50	E ma bon' amia m'acuoill
		Ab un baisar, quant me despuoill,
		M'en vau sans e saus e garitz.
XIV		Catola, per amor deu truoill
		Tressaill l'avers al fol lo suoill,
	55	E puois mostra la via a l'uoill
		Aprop los autres escharniz.