Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,029 Autor: Giraut de Bornelh Gènere: Canso Número: XXII

 

Chans en brolh   Ni flors en verjan

I	1	Chans en brolh      Ni flors en verjan
		Ni gens tems, can l’amen’abrils,
		Ni vertz erba ni blancha flors
		Tan no m’enansa ni m’atrai
	5	Vas un vers far com sol lo mans
		De mon adrech senhor e·l jais
		Que·m fai, car ditz que·l loncs espers
		E·l cudars m’aduira sabers.
II		E si·m dolh      Dins e defors chan.
	10	Per que·m paregra virars vils,
		Si tan ferm no·m lies Amors?
		Que m’ensenha qu’en son esmai
		S’esmera coratjos amans
		E que·m tenha coindes e gais
	15	E sofra; que·ls plus chars avers
		Dona bos sofrirs e temers.
III		E si·m solh      Anar corelhan,
		Car me semblet murs lo chambrils.
		Pero be conosc qu’es folors
	20	Que·m planha d’aisso qu’eu non ai;
		C’assatz me degra bels semblans
		Paiar, pos chascus ponh’al mais,
		E, can bos senher a·ls seus ders,
		Es lo noms avinens e vers.
IV	25	Mas l’orgolh,      S’eu·lh sobredeman,
		Abais l’avinens cors gentils
		Ab merce, c’aissi m’aura sors,
		E si s’esdeve ni s’eschai
		Que·m coche mos sobretalans
	30	C’a cal que trop vir ni m’eslais,
		Franha·s l’orgolhs e·l no-devers,
		Lo sobramars e·l trop volers!
V		Car si·m colh      Mos precs en chantan,
		No sui pro savis ni sotils,
	35	S’a fach no·m comti las onors
		E·l bo pensamen que·m sec sai;
		Car ades cut c’aura tres ans
		Que·m guidet e·m garit e·m trais
		De preizo tal qu’en sols dos sers
	40	M’agra delit lo remaners.
VI		Qu’era·m tolh      De mal e d’engan
		E serai ferms amics umils,
		Ja n’ai’agutz mans blasmadors
		Que dizon so qu’eu no creirai
	45	Que drutz s’enantisc’e s’enans
		Ab orgolh; mas no volh que·m bais
		Mos Bels-Senher, si·l fis plazers
		Loc no·n demandav’e lezers.
VII		E qui·lh n’er primers drogomans
	50	Que·m tolh d’altr’amistat e·m lais,
		Crescha·lh benanans’e poders ;
		Qu’eu no volh baizars ni jazers.
VIII		E can sobre totz sai no·s trais,
		No l’es cregutz aquel poders
	55	Que dona baizars e jazers.