Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,048 Autor: Giraut de Bornelh Gènere: Canso Número: XXIV

 

M'amia·m men'estra lei

I	1	M’amia·m men’estra lei.
		No sai per que ;
		Qu’eu no·lh ai forfach
		Pauc ni re,
	5	Si Deus m’aiut !
		Donc per que s’aïra,
		Pos eu nulh enoi no·lh fatz ?
		Car li platz ;
		C’als non i sai !
	10	E per so dic que mespren
		E car encolpatz no·m sen.
II		Petit enveiava·l rei ;
		Mas qu’er m’ave ?
		Que pert ses forfach ;
	15	Car del be
		Que m’a volgut
		Reconosc que·s vira !
		Per qu’eu marritz sui lonhatz
		De solatz
	20	Que ges no n’ai,
		Mas chan per abelimen
		E per plazer de la gen.
III		On plus la volh, menhs la vei
		Bona vas me.
	25	Si·lh sui ses forfach,
		No·lh sove.
		Tot es perdut,
		Desque no s’albira
		Com eu li m’er’autreiatz
	30	En sos bratz,
		Per que verai
		M’a trobat, e fai parven
		Que me tenh’a drech nien.
IV		Dens, qu’en er ? A vos m’autrei,
	35	Si·lh clam merce
		D’eis lo seu forfach !
		Tenra se
		Que·l cor no·lh mut ?
		Qu’eu noca sofrira
	40	Ja no·n fora tan iratz !
		Que viatz
		E de gran jai
		No·lh fenis so falhimen,
		Et ilh ses tort me repren !
V	45	Mas s’ilh ja tem qu’eu desrei,
		Prenda m’al fre ;
		Al primer forfach,
		Si ja·l ve,
		Quer’altre drut
	50	E, si res li tira
		De que·m forses ma foldatz,
		Ab un latz
		Leis me rendrai
		Pel col et am mais, si·m pen,
	55	Que m’aïres longamen.
VI		Drechs es qu’ela senhorei ;
		C’aissi·s conve
		Can m’aura forfach !
		Que jasse
	60	M’a be vencut,
		So qu’eu li plevira,
		C’anc de l’ora qu’eu fui natz,
		Apensatz,
		S’ilh s’o retrai,
	65	No fraissi so mandamen
		Nescis ni ab escien.
VII		Ges no cre qu’en fol felnei,
		Per qu’eu li cre
		Molt aver forfach.
	70	Qui la te
		Si·lh platz que·m tut ?
		Molt m’en abelira
		Sus pel chap colps d’astelatz —
		Ab sa patz,
	75	E si·s n’estrai,
		Semblara deschauzinien !
		Dic mal ? Oc, s’ilh o enten.
VIII		Joios, al rei fatz prezen
		D’un do que·m fetz avinen
IX	80	E vos, senher No-conten !