Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Codi: 070,005 Autor: Bernart de Ventadorn Gènere: Canso Número: V

 

Anc no gardei sazo ni mes

I	1	Anc no gardei sazo ni mes
		ni can flors par ni can s’escon
		ni l’erba nais delonc la fon,
		mas en cal c’oras m’avengues
	5	d’amor us rics esjauzimens,
		tan me fo bels comensamens
		qu’eu cre c’aquel tems senhorei.
II		Be l’agra per fol qui·m disses
		tro aras, qu’en sui tan prion.
	10	que ja·m tengues tan deziron
		amors qu’eu morir en pogues ;
		mas aras sen e sui sabens
		que totz autres mals es niens
		vas lo dezir ab pauc d’esplei.
III	15	A ! tan doussetamen me pres
		la bela qui·m te jauzion.
		qued eu no·m posc saber vas on
		re mais tan ben amar pogues ;
		car, on plus l’esgar, plus me vens
	20	s’amors, em dobla mos talens
		on eu mais d’autras domnas vei.
IV		Depus anc la vi, m’a conques.
		per que no l’er gen si·m cofon,
		car volh mais perdre·ls olhs del fron
	25	qu’eu ja re fassa c’a leis pes.
		d’aitan com poira, ‘n essiens
		no volh que·m si’ adiramens,
		que Deus aya faih de mi rei.
V		Tota gens ditz que Vianes
	30	es la melher terra del mon
		e las melhors domnas i son.
		doncs sabon tuih c’aisso vers es
		c’aicestas son las plus valens,
		e midons, que totas las vens,
	35	es la melher qued el mon sei !