Appel, Carl. Der Trobador Cadenet. Halle a. S.: Verlag von Max Niemeyer, 1920.

Codi: 106,005 Autor: Cadenet Gènere: Canso Número: I

 

Ai ! dousa flors ben-olenz

I	1	Ai ! dousa flors ben-olenz,
		plus clara que flors de lis
		ni miracdes ni robis
		ni carboncles resplandenz,
	5	a vos sui totz ben-volenz,
		umilz e fis e verais !
		domna, volgues per vos mais
		que sapchatz, saisos seria
		que·l mieus cors fos per vos gais !
II	10	E s’ieu fos per vos jausenz,
		de qui·s volgues, fos Paris !
		O agues Domas conquis !
		pois qui·s volgues, fos manenz !
		que non es aurs ni argenz,
	15	tors ni castels ni palais
		qu’eu ames tan com un bais
		que de vos, domna, faria ;
		et anc jorn no m’en estrais.
III		Eu no sui vostre parenz,
	20	oncle, fraire ni cozis ;
		pero francs vos sui e fis,
		humils et hobedienz
		per far vostres mandamenz ;
		et anc jorn no m’en complais,
	25	ni autra no m’i sostrais
		ni fara, tan quan vius sia.
		gardatz que·n faretz oi mais !
IV		Ben ai äutz los turmenz
		d’amor, e be·ls ai apris,
	30	et enquar non ai conquis
		dels mil mals dos jauzimenz !
		mas si·m fossetz ben-volenz,
		aleuzeratz me·l greu fais,
		car de vos amar no·m lais.
	35	plus tengra vos per amia,
		e·n sera chansos e lais.
V		Bella boca, blancas denz,
		bel esgart e plaisen vis,
		cors ben fait e gent assis,
	40	complit de bels noirimenz,
		avez, domna conoissenz ;
		et enquer’ a en vos mais :
		valors e fis pretz verais
		es en vos, e cortesia,
	45	e totz jornz broila e nais.
VI		Deus maudia malamenz
		fals lausenjadors savais,
		que totz jors pensan com bais
		jois e pretz e cortesia ;
	50	e d’als mos cors non s’irais.