Appel, Carl. Der Trobador Cadenet. Halle a. S.: Verlag von Max Niemeyer, 1920.

Codi: 106,023 Autor: Cadenet Gènere: Canso Número: VIII

 

S’ie·us essai ad amar

I	1	S’ie·us essai ad amar,
		vos cui am e tenc car
		e dupt e blan,
		no m’en devetz mostrar
	5	pus orgulhos semblan,
		qu’ieu vos am tan
		qu’el mon non es
		neguna res
		qu’ieu pesses que·us plagues,
	10	que no me fos bon’ e leugier’ a faire ;
II		Qu’ieu non ai ren a far
		mas vostre pretz lauzar
		de bon talan ;
		e, si mezura·us par,
	15	tro qu’ieu mais vos deman,
		un belh semblan
		de vos agues,
		tro·l mielhs vengues,
		qu’aissi m’avetz conques
	20	qu’antra no·m pot del cor la dolor traire !
III		E si·us platz, un baisar
		mi podetz ben donar
		ses vostre dan.
		del plus no·us aus preyar ;
	25	mas termini venran ;
		parlem enan,
		belh cors cortes :
		so qu’ie·us ai ques
		er mi dat o promes?
	30	diguatz m’en tot so qu’a vos n’er veyaire,
IV		E poirai m’en fizar
		en l’amoros esguar
		plazen que·m fan
		vostr’uelh rizen e clar ?
	35	e s’o fan per enjan,
		gran pecat n’an,
		qu’aissi cum es
		caps de totz bes
		lo reys aragones,
	40	aissi am ieu meils de negun amaire.
V		Que farai, pus laissar
		no·m puesc de vos preiar ?
		murrai aman ?
		non, per mon grat, enquar,
	45	tro vostre cors prezan
		abras baizan.
		ai, franca res,
		precx e merces
		mi deu valer e·l bes
	50	qu’ieu aus de vos en mas chansos retraire !
VI		En Engolmes
		agra trames
		mon chantar, mas no·y es
		la francha pros comtessa de bon aire.