Appel, Carl. Der Trobador Cadenet. Halle a. S.: Verlag von Max Niemeyer, 1920.

Codi: 106,016 Autor: Cadenet Gènere: Canso Número: X

 

Meravill me de tot fin amador

I	1	Meravill me de tot fin amador
		cossi d’amor si pot far malanans,
		e·m meravill cossi·n sent hom dolor,
		e·m meravill per que n’es hom clamans,
	5	q’ieu dic que mais n’a de ben que de mal
		cel que meins n’a, mas pero bes non val
		ren a cellui cui als ops faill sos sens,
		c’assatz trob’om d’omes entre las gens
		que se sabon qan ren perdon, marrir,
	10	e del gazaing no·is sabon esbaudir.
II		Nuills hom non viu ni reigna ab amor
		que non sia cortes e gen parlans,
		larcs et adreitz e creissens de valor,
		e non vailla ab amor cent aitans,
	15	no faria, s’estav’en son cabal ;
		e·l pretz qu’en a, car es pros e car val,
		esmenda ben las penas e·ls turmens ;
		et atressi deu esser plus valens
		de l’autre ben qu’en espera gauzir,
	20	et enaissi pot la clamor delir.
III		Son bon amic deu hom e son seignor
		servir, si tot lo bes faitz no·n es grans ;
		e no·is taing ges, ab c’om no·i perd’onor,
		que ja·il sia greus a sofrir l’afans,
	25	qu’el mon non a tant avinen captal
		cum pretz qui l’a, e pretz a cel qui val,
		et ab amor pot hom esser valens.
		doncs, pos d’amor mou totz enseignamens,
		ab c’om s’i pot honrar et enantir,
	30	si eus aunis qui non la vol servir.
IV		Aissi cum ant pretz li bon servidor
		e cum los fai honrar lor bos talans,
		atretal ant bon guizerdonador,
		et aitant mais cum l’onors es plus grans.
	35	doi fin aman devon esser egal
		en ben amar ; pero cel que mais val
		ni qui mais pot ni es plus avinens,
		deu un pauc mais destreigner chausimens.
		Amors, ben sap ma dompna que vol dir.
	40	aissi·m des ill a totz temps que grazir !
V		Vostra beutatz, ma dompna, ·m fai paor,
		mas eu·m conort en vostres bels semblans ;
		e temi trop, dompna, vostra ricor,
		mas conort mi, car vos platz que·us enans ;
	45	e temi trop, car vos sai tant cabal,
		mas conort mi, car vostre pretz tant val ;
		e temi trop car etz a totz plazens,
		mas conort me, car etz tant conoissens ;
		e temi trop, car vos aug escondir,
	50	mas eu·m conort, dompn’, el gen acuillir.
VI		Lausengador, mais q’a negunas gens
		vos dei grazir, si d’amor sui gauzens,
		car plus m’avetz honrat ab gen mentir
		e mieills cubert q’ieu no·m saubra cobrir.
VII	55	Coms de Tolza, vassalatges et sens,
		. . . . . . et esfors, ricx cors et ardimens
		vos an dat pretz que·us fai a totz grazir ;
		pero del pretz es tot el ben fenir.