Audiau, Jean. La Pastourelle dans la poésie occitane du Moyen Âge. Paris: E. de Boccard Éditeur, 1923.

Codi: 434,007b Autor: Serveri de Girona Gènere: Pastorela Número: XX

 

Entre Caldes e Penedes

I		Entre Caldes e Penedes,
		Pres de Santa Seglina,
		Lo loch que·l nobles reys cortes
		Me det, on pretz s'afina,
	5	Vi una toz' ab un pages;
		E dezia·l la nina:
		« Sabetz En Cerveri on es?
		Tan l'ay cercat, mesquina! »
II		Ez eu, can vinc, demandey ly,
	10	C'ausi que·m demandava:
		A que cercatz En Cerveri? »
		Ez il, sitot plorava,
		Respos: « Seyner, anc mala·l vi
		Que pres Belvis passava,
	15	Per que mos amies m'en feri
		Can sol'ab el parlava ».
III		— « Etz vos la pastora d'antan
		Qui·m fe tan gran falsia,
		C'anava·l bestiar cercan? »
	20	— « Oc, Seyner, e faria
		Eras tot lo vostre coman;
		E ay vos quist mant dia
		Per tal que y aja·l pastor dan,
		Pus a tort m'en feria ».
IV	25	— « Pus per dan de vostr'amador
		Vengues çay, Na bergeyra,
		Lo fait no tendri’ a honor.
		Teynetz vostra carreyra!
		Qu'en nuylla femna, ses amor,
	30	Falsa ne mercadeyra,
		No trob'om plazer ne douzor,
		Pus ses precs se perfeyra ».
V		— « Seyner, lo cor avetz camjat:
		Gen m'avetz covidada
	35	El loc que·l reys vos a donat,
		Pero no son dinada.
		E vos sabetz be, per vertat,
		C’om can fer femn' en bada,
		De tal fait l'adus volentat
	40	Don greu for’ accordada ».
VI		— « Na Toza, de tozas say ver
		Que·us pert hom ab destreyner
		Ez examen ab trop plazer,
		Que nuylls homs no·s pot feyner
	45	Que·us pusca sobrar ne saber,
		Ne, can fuyetz, ateyner.
		Per c'om no·us deu. si·us vol tener,
		Afluxar ne estreyner ».
VII		— « Seyner, ab vos vuyll remaner,
	50	E cuig vos en destreyner:
		Pus per vos perdey mon plazer,
		Vos lo·m rendetz, bel Seyner! »
VIII		— « Vostres obs vos faray per ver,
		Mas d'als no·us poretz feyner.
	55	Na Toz', eu iray en poder
		De l'Enfan, qu'es mon Seyner ».
IX		— « Si·l vezcomtess'o pot saber,
		Desgrat vos n'aura, Seyner ».