Appel, Carl. Der Trobador Cadenet. Halle a. S.: Verlag von Max Niemeyer, 1920.

Codi: 106,008 Autor: Cadenet Gènere: Canso Número: XIX

 

Ans que·m jauzis d’amor

I	1	Ans que·m jauzis d’amor,
		vos cujera plevir
		qu’om non agues cossir
		ni esmai ni dolor
	5	despueys qu’om s’en jauzia.
		pero eu n’ay dos tans.
		qui muer de gelozia ;
		mas pueys suy benanans,
		per qu’ieu vuelh mais suffrir e retener
	10	ab tot l’afan que tornar en querer.
II		Be·m mou de gran folhor
		que, quant vey aculhir
		a lieys cuy dey servir,
		los autres per honor,
	15	tem que·y mescle folia ;
		pero sos pretz, qu’es grans,
		enten qu’en dechairia,
		quar lai on es enjans,
		no pot bos pretz durar ni remaner ;
	20	donc tem ieu so que no m’en cal temer.
III		Enquer suffr’ieu major
		afan. — voletz l’auzir ? —
		ops m’es quan la remir,
		qu’ieu vir mos huelhs alhor,
	25	quar qui·s n’apercebia,
		mot leu seria·m dans,
		qu’avenir se poiria
		qu’autruy en fos celans ;
		per que·m cove far semblan non-chaler
	30	que·m fai ab lieys dezamoros parer.
IV		Ieu fugi maleguor,
		domna, per vos cubrir,
		que no·us vuelli tan jauzir
		que·us torn a dezonor.
	35	mais am ab carestia,
		pauc e pauc, qu’a un lans,
		mon jay.   Ja·l me tolria
		leu mos sobretalans,
		mas mezura hi met per retener
	40	e sen per vos guardar, que·us deu plazer.
V		Ab entieira valor
		vos sabetz enantir
		et ab sen far grazir
		et honrar ab honor.
	45	tals cum ie·us oraria
		es, cui platz, vostr’enans.
		belha ses mayestria,
		joves, gent - aconhdans,
		en vos mostra Valors tot son poder,
	50	et a Beutat no·us cal ren plus querer.
VI		Lauzengiers, merces grans !
		quar faitz cujar tal messonja per ver,
		don hom saubra so que no pot saber.