Appel, Carl. Der Trobador Cadenet. Halle a. S.: Verlag von Max Niemeyer, 1920.

Codi: 106,012 Autor: Cadenet Gènere: Canso Número: XX

 

Camjada s'es m'aventura

I	1	Camjada s’es m’aventura,
		don eu me sofrir’assatz,
		e si en breu non meillura,
		serai amics desamatz,
	5	qu’era·m loingna de son aire
		cella qe·m soli’ atraire
		mas chanssos    e mos gais sos ;
		e puois razos m’es faillida,
		si vuoill far chansson grazida,
	10	ops m’es ajuda de sen,
		o non chantarai plazen.
II		Dompna, no·m met en rancura
		ges nuilla res quem fassatz,
		q’ans farai tant de mesura
	15	q’ieu sofrirai tot en patz
		per lo ben qe·m soletz faire ;
		et es me greu a retraire
		que ja vos    vostras faissos
		desmentatz a vostra vida ;
	20	et er me bon, si·us oblida
		que vos fassatz faillimen,
		que·us planc plus que·l dan q’ieu pren.
III		E s’ieu per ma forfaitura
		fos, dompn’, aissi malmenatz,
	25	eu vos pliu tot so c’om jura.
		q’ieu fora desesperatz.
		mas ieu sui lejals amaire ;
		doncs, dompna, qe·us es vejaire ?
		qe anc pros    dompna que fos
	30	non dec laissar ses faillida
		son amic, pos l’a servida
		de son poder franchamen ;
		e s’o fetz, no·il estet gen.
IV		Dompna, si’naissi pejura
	35	vas me vostra voluntatz
		e non voletz aver cura
		que ab vos mi retengatz,
		ja no·m pliurai en flor gaire,
		tro que·n veja lo gran traire,
	40	c’om joios    ni melhuros
		en sia, car es delida,
		e flors, on miells es florida,
		ella se fraing per nien,
		qand so que mostra, desmen.
V	45	Pero mos cors s’asegura,
		dompna, car vos no·m camjatz
		per autre ni per falsura
		ni per ren, mas car vos platz ;
		per q’er plus leu del refaire ;
	50	et ieu sui leials amaire,
		mais joios    et amoros
		com qu’estiers no·m vei guerida
		ses vos, que m’etz abellida,
		pros dompna, mais per un cen
	55	c’al primier comenssamen.
VI		Lausengier, Dieus vos don vida
		que tals messonj’ es auzida
		don vos mi faitz honramen
		et amar celadamen.