Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,042 Autor: Giraut de Bornelh Gènere: Canso Número: XXVI

 

La flors del verjan

I	1	La flors del verjan
		Me vai remembran
		Un cortes afan
		E si no·s coches
	5	Que·l me remembres,
		Ja·m for’oblidatz
		D’enquerre solatz.
		Pero chams ni pratz
		Genser no meissona ;
	10	C’al cor me botona
		Tals un’amistatz
		C’a ma fe,
		S’aissi s’esdeve
		Com cilh qu’eu am m’a conven,
	15	Be dei chantar plus soven !
II		Donc drechs es qu’eu chan
		C’a precs que per man ;
		Mas era diran
		Que, si m’esforses
	20	Com levet chantes,
		Melhs m’ester’assatz.
		E non es vertatz ;
		Que sens echartatz
		Adui pretz e·l dona
	25	Si com l’ochaizona
		Nosens eslaissatz ;
		Mas be cre
		Que ges chans ancse
		No val al comensamen
	30	Tan com pois, can om l’enten.
III		E donc a que·m van
		Tot jorn chastian ?
		Qu’enquer planheran,
		S’eu ja joi cobres,
	35	Car no serai pres !
		Car s’eu jonh ni latz
		Menutz motz serratz,
		Pois en sui lauzatz,
		Can ma razos bona
	40	Par ni s’abandona ;
		C’om ben ensenhatz,
		Si be·i ve
		Ni mo drech chapte,
		No vol al meu escien
	45	C’a totz chan comunalmen.
IV		Mas pero l’altr’an,
		Can perdei mo gan,
		M’anava chantan
		Plan e clus ades
	50	E, si m’en tarzes,
		En for’encolpatz ;
		Car lo dos ni·l gratz
		No m’era vedatz !
		Mas era si·m sona
	55	M’amia felona,
		Sera·l bes ponhatz.
		Pois a que
		No·m ponhera be ?
		Si·m sona ni m’acolh gen,
	60	No·i a gran refranhemen ?
V		Mas si·l bel semblan
		Ni·l cor ni·l talan
		M’anava chamjan,
		No sai qui·m lauzes
	65	Qu’eu lo·lh sofertes.
		Sofrir !? Er’auiatz
		Com m’auci foldatz
		C’aissi·m salh al latz
		E·m contresperona,
	70	Can pechs me razona.
		E donc no·us cudatz,
		Pos merce
		Ditz c’aura de me,
		Si la·n razo folamen,
	75	Que s’en pened’e·s n’alen ?
VI		Irai donc enan
		Fis e ses engan
		Sofren e preian.
		Que si s’afranches
	80	Sos rics cors engres,
		Plus en for’onratz
		Que si fos venhatz
		Mos cutz e mos fatz ;
		Si be·i·s desazona,
	85	Car melhs no s’adona,
		Com en fos paiatz !
		Mas conve,
		Si noca n’ai re,
		Qu’esper e vensa sofren ;
	90	Que·lh franc venson franchamen.
VII		Era cridaran
		Aquist drut truan
		Qu’esperars te dan ;
		Mas qui ben ames
	95	E melhs esperes,
		Melhs for’avenhatz,
		Ja fos enganatz.
		Er’o demandatz
		Midons de Narbona !
	100	Que ? — Drutz que randona
		Ni·s fenh trop cochatz,
		Can s’ave
		C’una vetz rete
		D’Amor cal que jauzimen,
	105	Si no l’en pert mais de cen.
VIII		No·m recre
		D’esperar jasse
		Sobre totz que longamen
		M’aura menat ‘pren, no pren !’
IX	110	Ben es drechs que longamen
		Esper om gran jauzimen.