Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,079 Autor: Giraut de Bornelh Gènere: Canso Número: XXVIII

 

Tot suavet e de pas

I	1	Tot suavet e de pas
		Rien jogan
		Vauc un chantaret planan
		De dichs escurs
	5	C’us non i remanha.
		C’aissi leu, si s’era plas,
		Poiri’entrels Chatalas
		Passar en Proensa ;
		Que chansos leu entenduda,
	10	Lai val e lai s’esvertuda.
II		E tu que la·i portaras,
		Si·t vas tarzan,
		Potz n’aver damnatge gran,
		C’ab bos aürs
	15	Issiras d’Espanha ;
		C’us m’a dich dels bos Espas
		Duchs e ferms e seguras
		D’aital conoissensa
		Que bos aürs non aiuda,
	20	Des c’om so conselh refuda.
III		Vai t’en, que bon’anaras,
		Al meu semblan,
		E pero membre·t del gan
		Don mos Segurs
	25	Fetz avol barganha
		Que·l seus rics pretz sobeiras
		Es tornatz fragils e vas
		E d’avol parvensa,
		Per qu’es mort’e dechazuda,
	30	Si·l cor flac en ferm no muda.
IV		Tot sui del chastiar las,
		Mais a d’un an,
		Mas al seu leuger talan
		No·m val aturs
	35	C’ades me gavanha,
		Per que cudav’esser sas ;
		Mas s’eu fos dins de Milas
		Ni deves Faensa,
		No·m degra levar tal bruda,
	40	S’ela s’es mal chaptenguda !
V		Torna sai, que non iras
		Un pas enan,
		Fe que·t dei, que per aitan
		Sui eu perjurs
	45	E fis de gran lanha,
		Can qu’en traïnes certas !
		Pos vas fina·m sui trafas,
		Ja·l senher d’Argensa
		No·m dira que bona druda
	50	Per drech non aia perduda.
VI		Ditz tu que no remanras,
		S’eu t’o coman ?
		Vai donc, e si·t prec del chan
		Que no·l peiurs,
	55	Coras que·t sofranha
		Bos albercs, c’ostes vilas
		Auras, si Sanchs-Julias
		L’ostal no t’agensa ;
		C’un’avols rassa menuda
	60	Lai m’an baralha moguda.
VII		Mas ges d’aitals guerrers bas
		Non esper dan
		Ni no m’espert, s’ilh se fan
		Valhatz ni murs ;
	65	Que l’obr’es de fanha
		C’ans dechai c’us chauls vertas
		E com venria bos gras
		De mala semensa
		Ni per gen desconoguda
	70	Cal vitz be razo tenguda ?
VIII		C’ab entendedors bauzas
		Torn’en recrezensa
		Cortezi’ab gauch venguda
		Pauc prezad’e viltenguda.