Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Codi: 242,002 Autor: Giraut de Bornelh Gènere: Canso Número: XXXI

 

Ab semblan me fai dechazer

I	1	Ab semblan me fai dechazer
		Amors e·m dona marimen ;
		Car semblan m’es del joi c’aten
		Que ja·l cor no·m n’esclaire,
	5	Car en trop ric repaire
		Bels semblans me guida
		Que·m ditz que jauzida
		N’aurai ses falhia.
		Mas so·m dechai,
	10	Don fort m’esmai,
		Car l’us semblans m’abriva lai
		E l’altre·m desvia.
II		Ab bel semblan me fai voler
		Midons so que plus me defen ;
	15	Ab art et ab fals genh me pren
		Com s’eu l’era trichaire.
		Per leis pert mo veiaire,
		Tan m’es abelida ;
		Car on plus m’oblida
	20	Can ops me seria.
		Mos cors s’en vai
		Lai on li plai.
		Ses cor viu, car ab me no l’ai,
		Qu’ilh l’a en bailia !
III	25	Greu me poiria pro tener
		De s’amor ja segon mo sen,
		Pos aman no·i trop chauzimen
		Si com fizels amaire.
		Donc pos no·i gazanh gaire,
	30	Que non ai gequida
		L’amor que·m convida
		D’amar chascu dia ?
		Car no posc mai,
		Per c’amarai ;
	35	Que be leu enquera n’aurai
		De joi a ma guia.
IV		Pos no posc mai, ab bon esper
		Aleujarai lo mal qu’eu sen ;
		Fis serai ses tot jauzimen
	40	E gais per lo maltraire,
		Entro·m volha refaire
		Ma domna chauzida,
		Franch’et eissernida,
		De bela paria,
	45	Ab cui estai
		Jois ab cor gai,
		Ensenhamens ab pretz verai,
		Sens e cortezia.
V		Domna·lh genser c’om pot vezer,
	50	Oimais me fossetz d’avinen ;
		Que conoissetz mo fi talen
		E co·us am ses cor vaire !
		Cortez’e de bon aire,
		S’un pauc m’etz aizida,
	55	Joios a ma vida
		Serai on qu’eu sia ;
		Si no, be sai,
		Tan can viurai,
		Si tot no·m voletz, be·us volrai,
	60	Si tot no·m valia.
VI		Senher reis d’Arago, temer
		Vos devon vostre malvolen,
		Car fach lor avetz a prezen
		Totztems peitz lor afaire
	65	Quez om no sap retraire
		Si que n’es aunida
		Tota·lh lor partida
		E lor senhoria
		Mor e desvai ;
	70	Tan an d’esglai
		Que·lh plus ric son tornat savai,
		Car lor pretz te via !
VII		Coms, fort me plai,
		Car tan s’atrai
	75	Vostre noms vas fi pretz verai
		Qu’en re no·s desvia !
VIII		Ab joi t’en vai,
		Chansos, en lai
		Vas Mo-Senhor, ab cui estai
	80	Pretz e cortezia !