Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Codi: 293,013 Autor: Marcabru Gènere: Vers Número: XIII

 

Bel m'es quan son li fruich madur

I	1	Bel m'es quan son li fruich madur
		E reverdejon li gaïm,
		E l'auzeill, per lo temps escur,
		Baisson de lor votz lo refrim,
	5	Tant redopton la tenebror;
		E mos coratges s'enansa,
		Qu'ieu chant per joi de fin' Amor
		E vei ma bon' esperansa.
II		Fals amic, amador tafur,
	10	Baisson Amor e levo·l crim,
		E no·us cuidetz c'Amors pejur,
		C'atrestant val cum fetz al prim ;
		Totz temps fon de fina color,
		Et ancse d'una semblansa ;
	15	Nuills hom non sap de sa valor
		La fin ni la comensansa.
III		Qui·s vol si creza fol agur,
		Sol Dieus mi garl de revolim !
		Qu'en aital Amor m'aventur
	20	On non a engan ni refrim ;
		Qu'estiu et invern e pascor
		Estau en grand alegransa,
		Et estaria en major
		Ab un pauc de seguransa.
IV	25	Ja non creirai, qui que m'o jur,
		Que vins non iesca de razim,
		Et hom per Amor no meillur ;
		C’anc un pejurar non auzim,
		Qu'ieu vaill lo mais per la meillor,
	30	Empero si·m n'ai doptansa,
		Qu'ieu no·m n'aus vanar, de paor
		De so don ai m'esperansa.
V		Greu er ja que fols desnatur,
		Et a follejar non recim
	35	E folla que no·is desmesur;
		E mals albres de mal noirim,
		De mala brancha mala flor
		E fruitz de mala pesansa
		Revert al mal outra'l pejor,
	40	Lai on Jois non a sobransa.
VI		Que l'Amistat[s] d'estraing atur
		Falsa del lignatge Caïm
		Que met los sieus a mal ahur,
		Car non tem anta ni blastim,
	45	Los trai d'amar ab sa doussor,
		Met lo fol en tal erransa
		Qu'el non remanria ab lor
		Qui·l donava[n] tota Fransa.