Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Codi: 293,043 Autor: Marcabru Gènere: Vers de réponse Número: XX bis

 

Seigner n'Audric

I	1	Seigner n'Audric,
		Al vostr' afic
		Mout etz d'aver secos e plans,
		Puois so dizetz
	5	Que no·n avetz,
		Qu'en setembre vos faill lo grans.
II		Lai, ves Nadal
		Tot atretal
		Vos faill la carns e·l vins e·l pans
	10	Et en Pascor,
		Seguon l'auctor,
		Crezetz en l'agur dels albans.
III		S'a destre vai,
		Conosc e sai,
	15	Qu'etz de bon ostal segurans,
		Si l'agurs faill
		Venon badaill,
		Et es blasmatz sains Julians.
IV		Totz vostres us
	20	Sap Marcabrus,
		E totz vostre meiller bians
		Del ventr' emplir,
		E d'escarnir
		Es, e de cossentir putans.
V	25	Quan vos totz sols
		Etz ben sadols,
		Non vos es ges rics gaps loindans ;
		Segon tas leis
		As plus conque[i]s
	30	Que non fetz Cesar als Romans.
VI		De lengueiar
		Contra joglar
		Etz plus afilatz que milans ;
		Del vostre bec,
	35	N'Artimalec,
		No·is jauzira ja crestians.