Ernst, Willy. Die Lieder des provenzalischen Trobadors Guiraut von Calanso. "Romanische Forschungen", 44, 2 (1930), pp. 255-406.

Codi: 243,005 Autor: Guiraut de Calanson Gènere: Descort Número: X

 

Bel semblan                                                                      

I	1	Bel semblan
		M’auran
		Lonjamen
		Donat dan
	5	Pezan,
		Que·ill turmen
		M’ausiran
		Pensan.
		Donx, valen
	10	Cors prezan,
		No m’an
		Tan volven
II		Vostre clar vis
		E la fresca color
	15	E·l bel dous ris,
		Per que m’ausi Amor.
		Que paradis
		No volgr’ aver meillor
		Sol que m’aizis
	20	Ab vos sotz cobertor.
III		Ar dic folia,
		Quar tan m’enans ;
		Donx, si·us plazia
		Qu’ieu fos amans,
	25	Complitz auria
		Totz mos talans ;
		Donx, dous’ amia,
		No·m sia dans
IV		S’ieu ai dit
	30	Outracuidamen,
		Quar languit
		Ai tan malamen,
		Per que·us crit
		Merce umilmen :
	35	C’un petit
		De bel chauzimen
V		Acsetz de mi ;
		Que pos anc vi
		Vostre bel cors dous e plazen,
	40	No m’en parti,
		Ans vos servi
		De bon coratge leialmen.
		Donx si m’ausi
		Amors aisi
	45	Per vos, ja no·us estara gen,
		C’anc no·m parti
		Ni non gurpi
		De far vostre comandamen.
VI		Servida
	50	E grazida
		Us ai totas sazos,
		Complida
		E chauzida,
		La genser c’anc fos.
	55	Ma vida
		Es fenida,
		Si no·m faitz joios,
		Delida
		E perida
	60	E no per razos.
VII		Ans er pecatz,
		Si m’ausizetz,
		Qu’eu crei blasmatz
		N’er vostre pretz ;
	65	E donx veiatz
		Co·m destrenhetz,
		Dona, si·us platz,
		Ni co·m tenetz
VIII		Pres
	70	E conques
		Qu’ieu no·m puesc aillor rendre.
		Ges
		Grans merces
		No vol en vos deisendre.
	75	Fes
		Mi valgues !
		Que per dar e per vendre
		S’es
		Mos cors mes
	80	En far e en atendre
IX		Tot se que·us plaia
		Ni·us er bo ;
		Si tot m’esglaia
		La greus preizo,
	85	Voluntatz gaia
		M’en somo,
		Que que·m n’eschaia
		C’a vos me do.
X		E si·m fauc ieu totz volontos
	90	Ab fin cor gai           et amoros,
		Car trop vueill mai          morir per vos
		Que de nuill’ autra poderos.
XI		Al bon rei castela, N’Anfos,
		Coman mon cors, don’, apres vos.