Dejeanne, Jean Marie Lucien. Poésies complètes du troubadour Marcabru. Toulouse: Édouard Privat, 1909.

Codi: 293,036 Autor: Marcabru Gènere: Vers Número: XXXVI

 

Per l'aura freida que guida

I	1	Per l'aura freida que guida
		L'invern qu'es tant plens d'iror,
		L'auzeill qu'us no·n brai ni·n crida
		Sotz foilla ni per verdor,
	5	Car l’estiu, a bell' aizida
		Mesclon lor joia certana.
II		Non auch chant ni retentida
		Ni non vei brondel ab flor,
		Empero si ai auzida
	10	Una estraigna clamor,
		De Joi que·is plaing, ses ufana,
		Cui Malvestatz disciplina.
III		Proeza es forbandida,
		E son malvatz li meillor;
	15	Lonc temps auran cossentida
		Els maritz lor desonor,
		Als acropitz lenguas planas
		Torbadors d'amistat fina.
IV		D'entre dompnas es fugida
	20	Vergoigna e non sai cor;
		Las plus ant coa forbida
		E mes lo segl' en error,
		Mas lor semensa frairina
		Geta malvatz fruit quan grana.
V	25	Drudari' es trassaillida
		E creis Putia s'onor,
		E·il moillerat l'ant sazida
		E so·is fait dompnejador;
		Tant m'es bel quand us s'en vana
	30	Cum de can quant prist farina.
VI		Tant cum Marcabrus ac vida,
		Us non ac ab lui amor
		D'aicella gen descauzida,
		Que son malvatz donador,
	35	Mesclador d'avol doctrina
		Per Frans' e per Guiana.
VII		N'Amfos, ab patz segurana
		Que tengua, Valors l'aclina.