Appel, Carl. Bernart von Ventadorn, seine Lieder, mit Einleitung und Glossar. Halle a. S.: Verlag von Max Niemeyer, 1915.

Codi: 124,002 Autor: Daude de Pradas Gènere: Canso Número: -

 

Amors m'envida e·m somo

		Orthographie nach A.
I	1	Amors m’envida e·m somo
		qu’eu chant e fassa a saber
		cossi·m ten amors en poder
		e si m’es trop mala o no.
	5	e pois vei qu’il m’en apella                           (- 1)
		e·ill sazos, q’ades renovella,
		ben es dreitz qu’en chantan retraia
		cossi·m conorta e m’apaia
		uns jois qui s’es e mon cor mes
	10	per bon respieich que m’a conques.
II		De totz los bens qu’en amor so,
		ai ieu ara cal que plazer,
		car ieu ai mes tot mon esper,
		mon penssar e m’entencio
	15	en amar dompna coind’ e bella,
		e soi amatz d’una piucella,
		e qan trob soudadeira gaia,
		deporte mi, cossi qe·m plaia ;
		e per tant non sui meins cortes
	20	ad amor, si la part en tres.
III		Amors vol ben que per razo
		eu am midonz per mais valer,
		et am piucella per tener,
		e sobre tot qe·m sia bo
	25	s’ab toseta de prima sella,
		qandill es fresca e novella,
		don no·m cal temer que ja·m traia,
		m’aizine tant que ab lieis jaia
		un ser o dos de mes en mes
	30	per pagar ad amor lo ces.
IV		Non sap de dompnei pauc ni pro
		qui del tot vol sidonz aver.
		non es dompneis, pois torn’ a ver
		ni cors s’i ren per guizerdo.
	35	aja·n om anel o cordella,
		e cuich n’esser reis de Chastella !
		pro es dompneis d’amor veraia,
		si joias pren e, qan pot, baia ;
		e·l sobreplus teigna merces
	40	en thezaur e no·n done ges.
V		Franca piucella de sazo
		mi platz, qand m’es de bel parer,
		e·is vai de josta mi sezer,
		qan sui vengutz en sa maiso,
	45	e si·l vuoill baisar la maissella
		o·il estreing un pauc la mamella,
		no·is mou ni·s vira ni s’esglaia,
		anz poigna cum vas mi s’atraia
		tro qe·l baisars en sia pres
	50	e·l doutz tocars de luoc deves.
VI		De soudadeira coind’ e pro
		vuoill qe·m don’ ab pauc de querer
		tot so c’amors vol a jazer,
		e non fassa plaig ni tensso
	55	d’ostar camisa ni gonella,
		anz danze segon qe·l vïella
		cel que non a soing qe·is estraia
		de far tot joc c’amors l’atraia ;
		e s’il n’avia mais apres,
	60	ja del enseignar no·is feisses.