Bosdorff, Günther. Bernard von Rouvenac ein provenzalischer Trobador des XIII. Jahrhunderts Kritische Ausgabe mit Einleitung, Übersetzung, Kommentar und Glossar. Erlangen: Kgl. bayer. Hof- u. Univ.-Buchdruckerei von Junge & Sohn, 1907.

Codi: 066,002 Autor: Bernart de Rovenac Gènere: Sirventes Número: III

 

D'un sirventes m'es grans volontatz preza

I	1	D’un sirventes m’es grans volontatz preza,
		Rics omes flacs, e no sai que·us disses ;
		Quar ja lauzor no i auria ben meza,
		Ni·us aus blasmar, e val pauc sirventes
	5	Que lauza quan blasmar deuria.
		Pero sitot vos par follia
		A me platz mais que·us blasme dizen ver
		Que si menten vos dizia plazer.
II		Amdos los reis an una cauz’ empreza,
	10	Selh d’Arago et aisselh des Engles,
		Que no sia per elhs terra defeza
		Ni fasson mal ad ome que·l lur fes ;
		E fan merce e cortezia,
		Quar al rei que conquer Suria
	15	Laisson en patz lor fieus del tot tener.
		Nostre Senher lor en deu grat saber.
III		Vergonha·m pren, quant una gens conqueza
		Nos ten aissi totz vencutz e conques,
		E deur’ esser aitals vergonha preza
	20	Quom a mi pren al rei aragones
		Et al rei que pert Normandia.
		Mas prezan aital companhia
		Que ja nulh temps no fasson lur dever,
		Et anc no·n vitz autra tan ben tener.
IV	25	E pus no pren en la leuda torneza
		Qu’a Monpeslier li tollon siei borzes,
		Ni no i·s venja de l’anta que i a preza.
		Ja no·lh sia mais retragz Carcasses,
		Pos als sieus eis no·s defendria ;
	30	Assatz fa sol qu’en patz estia.
		Patz non a ges senher ab gran poder,
		Quan sas antas torna a nonchaler.
V		Ges trop lauzar, quan valors es mal meza,
		Non apel patz, quar mala guerra es,
	35	Ni ja per me non er per patz enteza,
		Mielhs deuri’ aver nom gauch de pages
		E dels rics que perdon tot dia
		Pretz, e ja fort greu no lur sia ;
		Quar pauc perdon e pauc lur deu doler,
	40	Quar ges de pauc non pot om trop mover.
VI		Lo reis N’Anfos a laissat cobezeza
		Als autres reis, qu’a sos ops no·n vol ges,
		Et a sa part elh a preza largueza.
		Mal a partit qui reptar l’en volgues.
	45	E dic vos que·m par vilania
		Qui partis e qui·l mielhs se tria.
		Mas ges per tan non a fag nondever,
		Quar a pres so qu’els no volon aver.
VII		Rics malastrucs, s’ieu vos sabia
	50	Lauzor, volontiers la·us diria ;
		Mas no·us pessetz menten mi alezer,
		Que vostre grat no vuelh ni vostr’ aver.