Jeanroy, Alfred; Salverda de Grave, Jean-Jacques. Poésies de Uc de Saint-Circ. Toulouse: Imprimerie et Librairie Édouard Privat, 1913.

Codi: 457,020 Autor: Uc de Sant Circ Gènere: Canso Número: IX

 

Mains greus durs pessamens

I	1	Mains greus durs pessamens
		E mains desirs plazens
		E maintas greus dolors
		Mescladas ab doussors,
	5	Sent e maint desplazer
		Cel q’estai en poder
		D’Amor et en baillia ;
		C’aissi viu meitadatz
		Amics enamoratz
	10	Ab joi et ab feunia.
II		Dompnas desconoissens
		Ab lor leugiers talens
		An tant faich qe amors
		Par als plus fis errors,
	15	Que non podon tener
		Un jorn ferm lor voler,
		E par lor cortesia
		Engans e falsetatz,
		E lor nescis baratz
	20	Jois e bella coindia.
III		D’aqi·m moc l’espavens
		Don ai estat temens,
		Per qe no·m fo sabors
		Bels semblans ni honors,
	25	Ni non tengui a ver
		Promessa ni plazer,
		Ni bel dich non prendria
		Mas en dreich de solatz.
		Mas er sui tals tornatz
	30	C’ab sol seignar venria.
IV		Als bels captenemens
		Et als cortes parvens
		Et al fugir follors
		Conois hom las meillors,
	35	Qe·l semblans fai parer
		So don a·l cors voler ;
		Doncs si de far foillia
		Non vos pren voluntatz
		Ja·l semblan no·n fassatz ;
	40	Non taing que plus en dia.