Bertoni, Giulio. I trovatori d'Italia. Modena: Editore Cav. Umberto Orlandini, 1915.

Código: 282,017 Autor: Lanfranc Cigala Género: Chanson religieuse Número: XXXVII

Oi, Maire, fillia de Dieu

I	1	Oi, Maire, fillia de Dieu
		E dels angels Reina,
		Cui Marc e Luc'e Mathieu
		[E] chascuns Sains aclina,
	5	Gardatz mi l'arm'e·l cors mieu,
		Flors de roza ses spina,
		Deu preian
		Que no segon mon enian
		M'an iutgan,
	10	Mas segon sa merce gran.
II		Qu'ieu ai fag dels pecchatz tanz,
		Per ma folla follensa,
		Que s'ieu vivia mil anz
		En aspra penedensa,
	15	Tant sai los faillimenz granz,
		Qu'eu non agra guirensa,
		S'ab merce
		Deus no·m perdon e·m rete,
		Non per me,
	20	Q'eu non ai faig lo perque.
III		Qu'ieu soi fals e mensongiers
		Enveios e raubaire,
		Et envers autrui molliers
		Faillir non doptei gaire,
	25	E cobes e mal parliers
		Fui e fins [e] galiaire
		[Et] engres
		S'ieu trobes cui enianes;
		Per q'ades
	30	Per tot aital mi cofes.
IV		E non ai per me poder
		De garir ni baillia;
		Per que·us vein merce qerer,
		Gloriosa Maria,
	35	Que mi deingnes tant valer,
		Qu'eu per vos gardatz sia
		De tot mal
		En aquest segle venal
		Desleial,
	40	E·m dones gaug eternal.
V		Si com Dieus fon de vos natz
		E·n receup charn humana,
		E·il vostra virginitatz
		Remas entier'e sana,
	45	Tot aissi·m gardatz, si·us platz,
		D'agag de mort subitana.
		Desplazenz
		Cre qu'eu sia veramenz,
		Penedenz
	50	De trastotz mos faillimenz.