Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Est. introductorio
* Glosario

* Presentación
* Bibliografía
* Testimonios
* Aparato crítico
* Notas
* Traducciones
* Imágenes

Bertoni, Giulio. I trovatori d'Italia. Modena: Editore Cav. Umberto Orlandini, 1915.

Código: 282,019 Autor: Lanfranc Cigala Género: Canso Número: XLV

Quant en bon luec fai flors bona semenza

I
1
Quant en bon luec fai flors bona semenza
   
Segon razon bons frugz en deu eissir;
   
Per que mos cors, qu'amors a faig florir
   
De flor de ioi, tramet frug de plazenza
 
5
Als finz amanz, chanzonet'avinen,
   
Qui nais d'amor e creis de benvolenza;
   
Que ges estiers chanzon ni ren plazen
    Nom pot hom far, si d'amor non comenza.
     
II
 
Ja fo tals temps q'ieu avia crezenza
 
10
C’om si pogues d'amor ab sen cobrir,
   
Mas ar no·l crei, anz sai, senes faillir,
   
Que s'amors pren en leial cor naissenza
   
Broilan vai tan chascun iorn e creissen
   
Que pren lo cor e·l gieng e l'entendenza,
 
15
Ni cap en cors ni neis en pensamen,
    Que plus que fons regorga sa creissenza.
     
III
 
Per mi o sai, q'ieu no vail en scienza;
   
Que se tot ieu non ai sobras d'albir,
   
Alques n'ai eu; mas car am senz mentir,
 
20
Non puesc celar qu'eu non fassa parvenza
   
D'amoros ioi e per zo chant soven,
   
Que maintas genz tenon a non-sabenza;
   
Mas me non cal de lur van tenimen,
    Qu'eu non quier mais, pos a midonz agenza.
     
IV
25
L'amoros ris e·il gaia captenenza
   
E·l bais, qe·m fei alegrar e languir,
   
Vos an liurat tot mon cor per servir
   
E vos l'avetz, domn', en vostra tenenza.
   
Mas qe sera del ric ioi q'eu aten?
 
30
Aurai l'eu ia? Hoc, sol merces vos venza;
   
Qu'eu sai que dreitz tan ric ioi non consen,
    Tan sobreval vostra valors valenza.
     
V
 
Plazenz domna, aiatz en sovinenza,
   
Can vos baizei, de l'amoros sospir
 
35
Qe·m venc dal cor e·m cuiet far fenir,
   
Mas be·m garic adonc vostra guirenza
   
Car m'apelletz «douz amic!» douzamen
   
E me dissetz q'ieu non agues temenza;
   
Aissi ac pro conort de iauzimen,
 
40
Ab c'om pogues hostar longu'atendenza.
     
VI
 
Ja non dig' hom q'ieu fassa faillimen
   
S'ieu chan d'amor ni faz d'amor parvenza,
   
Qu'aissi chantan sai la celadamen
    Cubrir, don nais mos iois ni m'entendenza.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI