Bertoni, Giulio. I trovatori d'Italia. Modena: Editore Cav. Umberto Orlandini, 1915.

Código: 258,001a=282,018a Autor: Jacme Grill , Lanfranc Cigala Género: Tenso (Partimen) Número: LIII

Per o car vos fegnetz de sotilment entendre

I	1	Per o car vos fegnetz de sotilment entendre
		Vos prec qe·m respondatz, en Lafranc, ses atendre:
		Qals es la piegiers res — e s'i met grant e mendre —
		Qe sia en est mond, q'om tochar puesc'o prendre?
	5	E si aizo·m dires, del cobleiar defendre
		Vos poires ab chascun q'ab vos voilla contendre.
II		En Iacme, pos vos plac vostr'arc sobre mi tendre,
		A zo qe·m demandatz vos voil tal respos rendre,
		Don ia vos no·m poscatz encolpar ni reprendre:
	10	La lengu'es tot lo piegz e·l miels q'om pot comprendre
		E cella qi pot mais pron tener e offendre;
		E s'al re sabetz piegz, de vos o voil aprendre.
III		En Lafranc, non cugei faillissetz ad eslire,
		Mas ar avetz dig zo don pluzors faretz rire,
	15	Car la lengua non ha poder mas qant del dire
		Zo qe·il manda lo cor, segon lo meu albire,
		Donc es pegiers cellui don mou lo mals; 'scondire
		No·us en podetz, s'ieu ia haia zo q'ieu dezire.
IV		En Iacme, semblan faiz qe siatz bos dormire,
	20	Tan tost vos oblides zo qe·m volguest devire,
		Qals fos la piegiers res c'om toche ni remire;
		Et avetz dich del cor, on hom non pot assire
		Tochar ni vista d'oill; mas qar lo·us plac escrire,
		Ieu crei qe·us aviatz prestat vostre conzire.