Bertoni, Giulio. I trovatori d'Italia. Modena: Editore Cav. Umberto Orlandini, 1915.

Código: 101,011a=433,001 Autor: Bonifaci Calvo , Scot Género: Tenso (Partimen) Número: LX

Scotz, qals mais vos plazeria

I	1	Scotz, qals mais vos plazeria
		D'aqetz dos plazentz solatz:
		Far podetz de vostr'amia
		Totas vostras voluntatz,
	5	Mas per re no·us consentria
		Qe·il parletz ni la veiatz
		E·n aitan qan viva sia
		Ia tant non seretz amatz:
		O vezer la tota via
	10	E parlar ab leis poscatz,
		Mas del plus non vos valria,
		Ni forzar non la deiatz;
		Ar veirem qal penriatz
		E no·i gardetz cortezia.
II	15	Bonifaci, fols seria
		S'ieu midonz, on es beutatz,
		Pogues aver a ma guia
		E tener nud'en mos bratz,
		S'ieu tot parlar no·il podia
	20	E·l vezers me·n fos vedatz,
		S'ieu aissi non la penria;
		Qe·l parlars qe m'autreiatz
		E·l vezers mi doblaria
		L'afan, se·l plus no·m fos datz.
	25	E qan mi remembraria
		Q'aissi·m fos desesperatz,
		Lo vas fos apareillatz,
		Qe ia plus [ieu] non viuria.
III		Scotz, segon ma conoiscenza,
	30	Follamen sabetz chauzir,
		Qan de leis l'umil parvenza
		E·l bel semblan e·l gen dir
		Giqetz, car mais vos agenza
		Ab leis iazer e durmir;
	35	Q'el mond plus greu penedenza
		Non crei c'om pogues suffrir,
		Com de parlar estenenza,
		Pos q'om n'a cor e dezir;
		Ni res nom pot far vallenza
	40	Ni conort ni abeillir
		Ses vezer; al meu albir,
		Vos faill ganre de sabenza.
IV		Bonifaci, en sovinenza
		Hai midonz e la remir
	45	Tal co·l iorn q'amors semenza
		En me de leis fes flurir
		El cor qi de l'estenenza
		Del vezer mi fai garir,
		E del parlar m'es guirenza
	50	Baizar, tener e complir:
		Mais vostres mais encomenza
		Totz iornz e non pot fenir;
		Per qe vos er, ses bistenza,
		Zo·m par e no·us pot fallir,
	55	Qom Tantalus a murir,
		E d'aizo aiatz plivenza.
V		Scotz, pos ma donna m'autreia
		Q'ieu parl'ab leis e domneg
		E q'ieu la remir e veia
	60	Sembla·m qe truep ben espleg;
		E qar non tain q'esser deia
		Pros domna d'avol autreg,
		No·m pren del iazer enveia,
		Q'ieu am mais, q'eu non enveg;
	65	Mas vostre fols cors dereia
		E vol ab gien passar dreg,
		Per q'ieu non conseil qe·us creia
		Domna, qi pretz a eleg;
		Qar no·us vei prim ni adreg
	70	Ves qe fin'amor plaideia.
VI		Bonifatz, be·m par q'esteia
		En pena e cor destreg
		Cel qi leis qe plus enveia
		E plus am'en tot endreg
	75	Ve e·il parl'e zo li neia
		Per q'amors fort lo destreg;
		E a vos platz, car no·us greia
		Amors ni·us fai chaut ni freg:
		Mas ieu, cui amors guerreia,
	80	Voil lo iazer, car ieu veg
		Q'alcus hom per al non preia;
		Per q'enantz voler lo deg,
		E del domnei me refreg,
		Car qecs ab sidonz domneia.