Bertoni, Giulio. I trovatori d'Italia. Modena: Editore Cav. Umberto Orlandini, 1915.

Código: 283,002=393,002 Autor: Lantelm , Raimon Género: Tenso (Partimen) Número: LXXIV

Raimond, una dona pros e valenz

I	1	Raimond, una dona pros e valenz
		Am' un fin drut e·l fai d'amor socors
		Tan qel maritz sap qals es lor amors,
		Estreing la domna e·il veda sos talenz.
	5	Tuit trei an mal et enoi e temenza.
		Qal dui dels tres fan plus grieu penedenza,
		La domna o·l drutz o·l maritz ielos?
		Que us vencerai dels tres e·us lais los dos.
II		Lantelm, lo drutz e·il domna m'es parvenz
	10	Qe tragan pietz, qar dobl'es lor dolors,
		Qe l’us a dol del dan q'a l'autre sors
		E del sieu dan es attressi dolenz.
		Aquist dui fan d'afan dobla sufrenza;
		Mas si·l maritz ha un petit de 'ntenza,
	15	El es d'aitant segner e poderos,
		C’us autre iratz en seria ioios.
III		Raimon, vos non chauzetz con conoiscenz,
		Qe·il domn' e·l drutz an tan finas douzors,
		Car son amat, q'emend'a l'afanz lors;
	20	Mas lo maritz trai se·n be totz tormenz
		Qu'el a del drut dol e mal ses garenza
		E de la domna afan e mescrezenza
		E de si dan, c'ades es angoissos,
		E·il domn 'e·l drutz s'aman, q'es restaurs bos.
IV	25	Lantelm, fort pauc es en amor sabenz
		Q'entrels amanz es aitals l’us e·l cors
		C’on plus s'aman, maier es lur langors,
		Si no·s vezon, q'il moron eissamenz,
		Com Tantalus qe zo que plus l'agenza
	30	Ve e non a aiuda ni valenza;
		Mas lo maritz, can plus es consiros,
		Baiza la domna e reman d'afan blos.
V		Raimon, d'amor sai miels c'autr'oms vivenz
		E ben vezer sai dels finz amadors
	35	Q'en pensan an tan fin ioi, qe·il paors
		De nuil gilos no·ls ved'esser iauzenz;
		La domn' e·l drutz an d'amor mantenenza
		E·l gelos es pels mals fors de scïenza
		Cant baiza lei, vas cui es orgoillos,
	40	Qe·l bais noil vai plus q'en l'aiga·l carbos.
VI		Lantelm, als drutz noz e val penzamenz,
		Qe si co·l penz lor es de ioi sabors,
		Aissi lur notz con a sel c'a las flors
		E faill als frutz, don pens' esser manenz;
	45	La domn' el drutz an d'amor la semenza
		Don chascus mor, car a del frug faillenza,
		Mas lo maritz non trai mal en perdos
		Q'el iatz a·l domn' e·l drutz mor enveios.
VII		Raimon, car a veraia conoiscenza,
	50	Na Salvatia de Londr' on iois comenza
		Voil diga qals trai mal plus angoissos
		La domn' e·l drutz o lo maritz gelos.
VIII		Lantelm, d'aisso voil qe don la sentenza
		Na Binïa de Canas c'ades ganza
	55	Et es de pretz sobrana de las pros
		D'onor de sen e de belas faissos.