De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Código: 160,001=180,001 Autor: Frederic de Sicilia , Coms d'Empuria Género: Deux coblas avec tornada Número: CLXXXV

Ges per guerra nom chal aver consir

		DOMPN FREDERIC DE CICILIA:
I	1	Ges per guerra nom chal aver consir
		Ne non es dreiz de mos amis mi plangna,
		Ch’a mon secors vei mos parens venir
		E de m’onor chascuns s’esforza es lagna
	5	Perchel meu nom major cors pel mon aja;
		E, se neguns par che de mi s’estraja,
		No l’en blasmi, ch’enmental faiz apert,
		Ch’onor e prez mos lignages non pert.
II		Pero el reson dels Catelans auzir
	10	E d’Aragon puig far part Alamagna,
		E so ch’enpres mon paire gent fenir;
		Del Regn’aver crei che per dreiz me tangna;
		E, se per so de mal faire m’asaja
		Niguns parens, car li crescha onor gaja,
	15	Bem porra far dampnage a deschubert,
		Ch’en altre vol no dormi nim despert.
III		N’Ebble, va dir a chui chausir so plaja
		Che dels Latins lor singnoriu m’apaja,
		Per q’eu aurai lor e il me per sert;
	20	Mas mei parenz mi van un pauc cubert.
		Responsiva del CON D’ENPURIA:
I		A l’onrat rei Frederic Terz vai dir
		Q’a noble cors nos taing poder sofragna,
		Peire qomte; e pusc li ben plevir
		Che dels parenz ch’aten de vas Espagna
	25	Secors, ogan non creja ch’a lui vaja,
		Mas a l’estiu fasa cont chels aja
		E dels amics, e tegna li oll ubert
		Chels acoilla pales e non cubert.
II		Ne nos cug ges chel seus parenz desir
	30	Ch’el perda tan chel Regne noill remagna
		Nel bais d’onor, per Franzeis enrechir;
		Ch’en laiseran lo plan e la montagna;
		Confundals Deus e lor gorgoil dezaja!
		Pero lo Rei e Cicilian traja
	35	Onrat del faitz, chel publat el desert
		Defendon ben; d’acho sion apert.
III		Del gioven Rei me plaz car non s’esmaja
		Per paraulas, sol q’a bona fin traja
		So chel paire chonquis, a lei de sert,
	40	E, sil reten, tenremlem per espert.