Bosdorff, Günther. Bernard von Rouvenac ein provenzalischer Trobador des XIII. Jahrhunderts Kritische Ausgabe mit Einleitung, Übersetzung, Kommentar und Glossar. Erlangen: Kgl. bayer. Hof- u. Univ.-Buchdruckerei von Junge & Sohn, 1907.

Código: 066,001 Autor: Bernart de Rovenac Género: Sirventes Número: IV

Belh m'es quan vei pels vergiers e pels pratz

I	1	Belh m’es quan vei pels vergiers e pels pratz
		Tendas e traps e vei cavals armatz
		E vei talhar ortz e vinhas e blatz
		E vei gienhs traire e murs enderrocatz
	5	Et aug trompas e grans colps dels nafratz,
		E mal lur grat meto·ls en las postatz.
		Aital guerra m’agrada mas que patz,
		Non tals treguas ont om si’ enganatz.
II		Tot aisso dic per l’Enfant d’Arago,
	10	E deu aver nom Enfant per razo,
		Quar leu s’ave qu’enfans fa falhizo,
		Et elh falhi, quant aucis son baro
		Raimon Guilhem qu’anc tregua no·l tenc pro,
		Ni en sa cort jutjamens datz no·l fo.
	15	Per que totz selhs a cui elh treguas do
		Devon duptar aquelh enfant fello.
III		Treguas trencar escien esta lag,
		E quant a fe no s’emenda·l forfag ;
		Per que l’Enfant a fag un fol assag
	20	Ab un mal sag qu’als Catalas a fag.
		E dizon tug qu’om de silh tregua·s gag
		E que·l son cors i fo mes en fol plag,
		Qu’a filh de rei esta mal atrazag,
		Quant ampara nulh offici de sag.
IV	25	Enaissi par qu’el sag no fon certas ;
		Quar n’a lauzor d’aul gent e de vilas
		E gran blasme de totz los sobiras,
		E si d’est sag no·s clamon Catalas,
		Om los tenra totz per flacs e per vas
	30	E plus suffrens que negus ermitas.
		E meta i quascus per si sas mas,
		O·s tenr’a pus que rabia de cas.
V		Al vescomte de Cardona desplei
		Mon sirventes, ans que alhors desrei,
	35	Que mai vol pretz que laire pres mercei ;
		Quar en valor se banha, don ieu crei
		Que pro a pretz, qui·s vuelha so plaidei,
		Tot vescomte qui n’a egal d’un rei.
VI		A gran postat esta mal, fe que·us dei,
	40	Que trenc treguas ni que tan lag desrei ;
		Quar de guerra no·s pot onrar lo rei
		Trencan treguas a volontat, so crei.