Levy, Emil. Der Troubadour Bertolome Zorzi. Halle: Max Niemeyer, 1883.

Code: 074,003 Auteur: Bertolome Zorzi Genre: Chanson religieuse Numero: I

Ben es adregz

I	1	Ben es adregz
		E sap qu’es alegranza
		Et esser pros
		E tot lo melh chauzir
	5	Cel cui respegz
		D’enteira benanansa
		Reten jojos,
		E sol per deu servir
		Los vans delegz
	10	E las vanas legors
		Del segle fals
		Relinquis et ublida,
		Qu’aissis conquer
		Viure qu’es melhs de vida.
II	15	Qu’en alegrier
		A tot jorn mais s’afina
		Sol esperan
		Lo joi perpetual,
		El dezirier
	20	Del joi ha per mezina
		Contra l’afan
		El destric temporal.
		Si que leugier
		Li semblon li plus greu,
	25	Et a sa fi
		Vai l’arm’ en vid’ eterna.
		Per qu’es fols quecs
		Qu’en tal joi nos governa.
III		Si tot estregz
	30	Sembl’a l’encomenzanza,
		Pois saboros
		Es tan l’estern seguir
		Qu’estiers destregz
		Et a greu ses pezanza
	35	Es sofrachos
		Chascus de joi jauzir ;
		Qu’el plus elegz
		Iois mondanz es dolors
		Tan deslejals,
	40	Qon hom plus l’a complida,
		Tan mais s’arm’ er
		Aprop sa mort marrida.
IV		Doncs laig sentier
		Sec cel qu’ab leis camina,
	45	E qui penzan
		No valh vid’ eternal
		El gaug sobrier
		Qu’a cel qu’a deu s’aclina,
		E con pezan
	50	Son turment enfernal,
		E com cel qu’ier
		Visquet, mor hui de leu ;
		Quar dregz aissi
		Vol que chascuns decerna,
	55	Com hom es cecs,
		Pois fai don s’arm’ enferna.
V		Per qu’eu cui dregz
		Non pot cobrar pidanza,
		Precl’aut pidos,
	60	Qui volc per nos murir,
		Quel mieus nelegz
		Nol faza far venjanza,
		E que cochos
		Fazam si obezir,
	65	Quel chauz el fregz
		Qu’atrai aitals follors,
		M’er estiers sals,
		Tant fort m’es abellida
		L’artz qu’a l’enfer
	70	L’arma chapdel’ e guida.
VI		Mas si bem mier
		L’enfernal disiplina
		Per laid enjan
		E per faire maint mal,
	75	Socors entier
		M’en faiz, verges reїna,
		Don conort an
		Maint cui razos desval.
		Quar del tot pier,
	80	Si dieus nom fai en breu
		Perdon tan fin
		Qu’oimais plus no m’esquerna
		Fals jois ni decs,
		Don moir’ en sempiterna.
VII	85	Don vos requier,
		Dompna, qu’en prejatz deu,
		Qu’eu sec ma fi,
		E noi trueb vid’ eterna,
		Si vostre precs
	90	Nom n’es lums e lanterna.