Levy, Emil. Der Troubadour Bertolome Zorzi. Halle: Max Niemeyer, 1883.

Code: 074,015 Auteur: Bertolome Zorzi Genre: Sirventes Numero: II

S'ieu trobes plazer a vendre

I	1	S’ieu trobes plazer a vendre
		Et agues pron de pagar,
		Ben mi poiri’ om reprendre,
		S’ieu no l’anes acatar,
	5	Quar en tal desplacer son
		Que ma vida nom ten pron ;
		Per qu’eu m’esfortz d’alegrar,
		Quar per rir' e per jogar
		D’enueg si sol hom deffendre.
II	10	Mas ieu non puesc ges comprendre
		Per planher ni per chantar
		Qu’eu senta ma dolor mendre
		Al maiti com al colgar.
		Per qu’ai mon cor tan felon
	15	Qu’eu contrafeira Sanson,
		Quel palais fez desrocar,
		Sil mon pogues desfermar
		E far l’en abis deissendre.
III		Qu’el non val un ponh de cendre,
	20	Qui ben vol a dreg jutjar,
		Tan s’a laissat sobreprendre
		Falsur’ e desmezurar ;
		Quar en aquesta sazon
		Giet hom los sieus a bandon,
	25	On mielhs los degr’ ajudar,
		E puenh’ en tals a levar
		Que denh serion de pendre.
IV		Pero ben deu hom espendre
		Sai e lai e metr’ e dar,
	30	Qu’aissis pot grand honor rendre.
		Mas chascus se deu gardar
		De passar outra mesura,
		Quar plus a greu falhizon
		En trop espendr’e donar
	35	Qu’en tener et amassar,
		Nil pot hom a dreg contendre.
V		Mas ieu nom volh plus atendre
		En aital plag razonar,
		Quar assatz mi pot entendre
	40	Cel qu’aisso m’a faig retrar.
		Pero sapcha quem sab bon,
		Si pot far gran mession,
		Mas aitan li volh mandar
		Qu’a mon joglar deu pensar,
	45	Sis vol gardar de mesprendre.
VI		Elh volh un plag far aprendre
		Qu’aug del rei joven coindar,
		Qui fez sa liuranda prendre
		E gardet si d’espensar
	50	Per far plus avinen don
		Al cavalher cui ops fon,
		Quar per los sieus enanzar
		Deu s’a luec amesurar
		Qui vol son pretz aut estendre.
VII	55	Domn’, amors m’a faig enprendre
		Tan gran ponh’ en vos amar
		Que tengral plus dur mal tendre
		Per vos servir et honrar,
		Quar la beutatz d’Ansalon
	60	El sabers de Salomon
		Si pod en vos conparar,
		Per qu’om nos pot trop lauzar
		Nil vostr’ onranz’ escoissendre.
VIII		Ioglars, faig ai ma chanson,
	65	Mais car perdei ta razon
		Non la vuelh ges enviar
		A Mon Astruc, cui non par
		Qu’om ja lo posca reprendre.
IX		Sirventes, di mon joglar
	70	Qu’om sai non pot joi cobrar,
		Si trop non a que despendre.