Levy, Emil. Der Troubadour Bertolome Zorzi. Halle: Max Niemeyer, 1883.

Code: 074,005 Auteur: Bertolome Zorzi Genre: Canso Numero: VI

Entre totz mos cossiriers

I	1	Entre totz mos cossiriers
		Non trob un sol quem consenta
		Qu’ieu sia d’amor guerriers
		Per nulha dolor qu’en senta,
	5	Car sim malmenet ogan,
		Gen mi restaura eral dan ;
		E d’aisso trac garentia
		Lo camje que m’a faich far
		D’enemia per amia
	10	De bons aips ses par.
II		Qu’ieu sui estatz parsoniers
		De tot so qu’aman tormenta,
		Car fui vas tal vertadiers
		Qu’en trop d’orguolh s’atalenta ;
	15	Ni m’en camjiei tan ni quan
		Tro qu’amors m’en det talan
		Em fetz per sa cortesia
		Tant adreicha dompna amar
		Que nulha res qu’el mon sia
	20	Noi pot melhurar.
III		Tant es sos cors plazentiers
		E sa cara bella e genta
		E sos sens prims e sobriers
		Sos valors, c’aissom garenta
	25	Qui ben la vai faissonan,
		C’aissi es faicha a garan
		Que beutatz plus noi cabria
		Ni causa de benestar,
		Tant gen se capdella eis guia
	30	En tot son affar.
IV		Don sortz tant sos pretz entiers
		Que, s’ieu valgues per un trenta,
		Plaitz non fora dreituriers
		Qu’en s’amor pauses m’ententa,
	35	Mas tant m’anei conortan,
		Car la vi d’umil semblan
		E d’amorosa paria,
		Que mos cors auset cuidar
		Quelh plagues, s’ieu l’entendia
	40	Servir et honrar.
V		Per qu’eram guida alegriers,
		Car il m’autreja e coventa
		So don non serai parliers,
		Sol de ben far nois repenta.
	45	Ai nesci ! Malvatz parlan. —
		E per que ? — Car cudaran
		Aquist fals cui dieus maudia
		Quet fass’en trop esperar. —
		Non fara alguns, si ben tria
	50	So que deu triar.
VI		Huoimais ten vai, messatgiers,
		E ma chanson li presenta,
		E di que mos desiriers
		De l’acomplir m’espaventa ;
	55	Non jes qu’ieu dopti d’engan,
		Mas car tant vauc desiran
		Qu’ieu tem quel desirs m’aucia,
		Anz c’aisso puosca acabar,
		Sim trebalh la nuoich el dia
	60	Per trop desirar.
VII		E dil que d’anz e deriers
		Tal amor ai clausa e centa
		Que nulhs aips de lausengiers
		En mi non s’ertz ni s’asenta,
	65	Anz m’a tot al sieu coman
		Tant afinat fin aman
		C’afinar plus nom poiria,
		Sim saup plazen affinar
		Jutgan m’en sa senhoria
	70	Ab un dous esgar.
VIII		E diras que volontiers
		Dic cum es de sen manenta
		Et al sieu sui tant leugiers
		Quel vers mon dire desmenta
	75	. . . . . . . . . . . . . . . . . . .
		Non agra trop sen d’enfan
		Totz hom que mal en creiria,
		Pois anc no fetz malestar ?
		Hoc, car ren que mal estia
	80	No’n au er retrar.
IX		E sit menaval sentiers
		Vas l’orgolhosa avinenta,
		Dil qu’ieu tenc per messongiers
		Cels que cercon sa parenta,
	85	Qu’ieu nom vau de lieis camjan,
		E segura la d’aitan
		Que son affan i perdria,
		Si m’entendia cobrar,
		Tals denhal tort quem fasia
	90	El mal esmendar.
X		Pros dompna, amors m’onra tan
		Qu’il nos vai tan gen mesclan
		Qu’inz el cor ai, on qu’ieu sia,
		Vostre doutz vis el cor car,
	95	Et il l’an en lur balhia
		Ferm e fin e clar.