Levy, Emil. Der Troubadour Bertolome Zorzi. Halle: Max Niemeyer, 1883.

Code: 074,002 Auteur: Bertolome Zorzi Genre: Canso Numero: III

Atressi cum lo camel

I	1	Atressi cum lo camel
		Ten hom ab pauca liuranda
		Benigne e fort e fizel,
		Si ben li dona turmen,
	5	Pois fui en vostra comanda,
		Ab petit de jauzimen
		Humil et obedien,
		Amors, m’avez retengut
		Carjat d’amoros afan,
	10	Mas per o ges no cresatz
		Qu’en re se camje nis mut
		Per greu maltraich ni per dan
		Mos desirs ni mos penssatz
		Ni quem clam
	15	De vos ni de lieis cui am.
II		Car sai qu’en vostre chastel
		Cel que vas vos non fai ganda
		Per ren que l’en semble fel,
		Troba plus leu joi plazen
	20	Quel fenhens qui leu desmanda
		So don plus vos fai prezen,
		Car l’us tenetz del serpen,
		Queis lonha del home nut
		El vestit mostr’ esfortz gran :
	25	Qu’als nutz d’enjans eslonhatz,
		E d’esforciva vertut
		Cels qu’en veston mostratz tan
		Quels fins sens comte alegratz,
		Els crois a pieitz malmenatz
	30	Quels natz Cham
		Non fetz dieus el temps Abram.
III		Don per calor e per gel
		Senes voluntat truanda
		M’auretz mielhs que dieus Abel
	35	Non ac a son mandamen,
		Car mos cors m’ensenha em manda
		Quel saber, l’engenh el sen
		Paus el vostr’ enantimen
		E quel mal qu’ieu n’ai agut
	40	Oblit e meta en soan,
		Cum dieus fai tortz esmendatz,
		Pois que tant m’avetz valgut
		Que sol per vostre coman
		La gensser mi sofra en patz,
	45	Quez ab alques de solatz
		Nos siam
		Ensems el vostre liam.
IV		Mais s’ieu ja trob mon apel,
		L’amoroseta bevanda
	50	Non feric ab son cairel
		Tristan n’Iseut plus fortmen,
		Quand ilh venion d’Irlanda,
		Cum ilh me ab doutz parven,
		C’anc, pois n’aic entendemen,
	55	Mei voler nois son mogut
		De far tot son benestan,
		E s’anc lezers m’en fon datz,
		Plus n’ai pres joi e salut
		Qu’anz non pres d’Alda Rotlan,
	60	E sui aissi fasendatz,
		Quand sos gens cors es iratz,
		Qu’ieu n’aflam
		Tant que mi eis en desam.
V		E car aissi mi capdel,
	65	Valra m’en plus ses demanda,
		Car trop a bon pretz revel
		Cel que non fai pajamen
		En totz faitz, cum dreitz comanda,
		Nis tanh quem don espaven
	70	Qu’il nom creissal dreich breumen,
		Pois son pretz a tant cregut,
		C'omnon a ren tant prezan
		Que mais non l’auza vertatz,
		Ben c’om l’aja aut estendut
	75	Sobre celz qu’al som estan,
		Car sap et es vers proatz,
		C’ai son desir plus assatz
		Quel reclam
		Non fai l’esperviers per fam.
VI	80	Mas ges desotz mon mantel
		Non creja c’orgolhs s’espanda,
		Sil par c’a razon l’apel,
		C'aissicom hom longamen
		Non pot viure ses vianda
	85	Gaire en vida non enten,
		Si’n breu noi trob valimen,
		Si m’ant doutz conssir vencut
		Elh pauc solatz deziran.
		E car aissi’n sui sobratz,
	90	Beis tanh que mos dreitz m’ajut,
		E si’n trop vauc esperan,
		Quem deja valer pietatz,
		Pos per lieis fon jois donatz
		A N’Adam,
	95	Si beis tolc lo fruich del ram.
VII		Dompna, aissi com a Babel
		Nos poc far la tors tan granda
		Qu’il pogues pujar al cel,
		Nois pot dir complidamen
	100	La grans beutatz queus garanda
		Ni cum avetz plenamen
		Tot so qu’a dompna estai gen ;
		Don non ai gaire entendut
		De vos lauzar en mon chan
	105	Car noi dopta pros ni fatz,
		Sius a vista, [e conogut
		Cum ab covinen semblan
		Respondetz] et escoutatz,
		Car anc lo menhs apajatz
	110	No fetz clam
		Plus cum l’us de l’autre fam.
VIII		Don esper mon atendut
		Cobrar en aquest deman,
		Pero si n’a dregz jujatz,
	115	N’a Gaug de Cor, que l’escut
		Vos rend e la lanssa el bran ;
		Car si neis ma mortz vos platz,
		Ieu la volh sofrir en patz,
		Car ieus am
	120	Mais que no fetz Sarra Abram.
IX		Dompna, quar gauch me donatz,
		On plus mos cors es iratz,
		Aissius dam
		E sobre tota reus am.