Levy, Emil. Der Troubadour Bertolome Zorzi. Halle: Max Niemeyer, 1883.

Code: 074,006 Auteur: Bertolome Zorzi Genre: Chanson religieuse Numero: V

Jesus Critz per sa merce

I	1	Jesus Critz per sa merce
		M’a faig tan d’onranza,
		Er quant mortz mi ten al fre,
		Quem sembla pesanza
	5	Viur’en est segle venal,
		Deslejal,
		On renhon trastuit li mal ;
		Per qu’ieu grazisc mercejan
		La volontat el talan
	10	Que per sos plazers me guida,
		E prec lo que no m’ublida.
II		D’aitan qu’eu noi truep merce,
		Anz qu’aja venjanza
		Del mal qu’eu ai faig ancse,
	15	Qu’estiers ai certanza
		Qu’eu aurai pen’eternal
		Enfernal,
		Tal son fag tuit mei jornal.
		Mas tan mi vauc conortan,
	20	Quar repentizon ai gran,
		Qu’en chantan volh dir ma vida,
		Quar sia ma colp’ auzida.
III		Mas per melhs trobar merce
		A l’encomensansa
	25	Dic quel mals qu’ai fait al be
		Ses tot comt’ avanza,
		Qu’a lei de fol natural,
		Cui non cal
		S’aura dol perpetual,
	30	Sol qu’el segle plazer an,
		Ai viscut ma mort cercan,
		Tan m’es la cortz abellida
		Que totz a mal far convida.
IV		Qu’eu ai viscut ses merce,
	35	Enics, plens d’erranza,
		Ergolhos, de mala fe,
		Ab desmesuranza,
		Falsan contra maint lejal,
		Ni quis al,
	40	S’ieu n’aic joi e mon cabal.
		Don ai faigz per lait enjan
		Vers e sirventes e chan
		D’avol razon deschauzida
		Ab mainta mensonh’ aunida.
V	45	Et ai ques mainta merce
		Sol per galianza
		E chiflat autrui e me
		En avol amanza,
		Per qu’en peccat criminal
	50	E mortal
		Ai tan sobrancier captal
		Que, quant m’o vauc remembran,
		Trembl’e fremisc consiran
		La pena qu’es establida
	55	A cels qui fan tal falhida.
VI		Mas si dieus noi a merce
		Per sa gran pidanza,
		Com sera doncs, folz, de te ?
		Quals razos t’enanza ?
	60	Ieu noi sai ni tal ni qual,
		Quar nom val
		Quant ai faig un ponh de sal,
		Nim vauc d’al aseguran
		Mas de pezanz’ e d’afan,
	65	S’ab veraja repentida
		Merces non te ma partida.
VII		Glorios reis de merce,
		Si per fol’ enfanza
		Fis ni dis ni penziei re
	70	Don mier malananza,
		Datz n’al cors dol temporal
		Tan coral
		Qu’al forfaig an per egal,
		Els mals qu’a l’arma n’eschan
	75	Tuelhaus si merces denan
		Qu’il si’ aprop ma fenida
		En paradis aculhida.
VIII		E vos, domna, clam merce,
		On ai m’esperanza,
	80	Que prejatz lui que m’estre
		D’aital perdonanza
		Qu’a l’armam retenga sal
		Bon logal
		Lai el renh celestial,
	85	Quar per vos viu esperan
		Que l’angels cui la coman
		La menra lai ab jauzida,
		Quant sera del cors eissida.
IX		Hai segles, voigz de merce,
	90	Com ha vil cuidanza
		Totz hom qu’aver de vos cre
		Joi ni benananza !
		Quar vostr’ afar trueb hom tal
		Quel desval
	95	On plus resenbla cabal,
		Per qu’aicel quius ser nius blan
		Non sap de pro chauzir dan
		O vol penr’ anz mort marida
		Que benananza complida.
X	100	Ben es folz qui l’arm’ ublida
		Per aquesta mortal vida.