Levy, Emil. Der Troubadour Bertolome Zorzi. Halle: Max Niemeyer, 1883.

Code: 074,012 Auteur: Bertolome Zorzi Genre: Sirventes Numero: VIII

On hom plus aut es pojatz

I	1	On hom plus aut es pojatz,
		Mais pot en bas cazer,
		Si non sap retener
		Lo sentier don es guidatz,
	5	Per queis devon temer
		Baissar e dechazer
		Venecian, qu’en l’aut grat
		D’ausor pretz ant pojat,
		E Genoes, qu’eissamen
	10	Vivon de pretz manen,
		Quar solon far totz lor afars ab deu,
		Mas er fant pieitz que si fosson judeu.
II		Quar judeus ni renejatz
		Non deuria voler
	15	Preisoniers destener
		Ab sos guerriers acordatz,
		E lor ven a plazer
		Prop de mil pres tener,
		Ben qu’il sion acordat,
	20	C’a tort et a pechat
		En morran tuich malamen,
		E sabon veramen
		Qu’a negun d’elz tant non valon li sieu
		Que ja per els se dechaja nis leu.
III	25	Mas orguolhs e vanitatz
		Vensson tant lor saber
		Qu’entrels non pot valer
		Dieus ni merces ni pidatz,
		E par ben s’ieu dic ver,
	30	Quan, sol per far parer
		Qu’il se tenon per pajat
		Dels pres com an coindat,
		Laisson morir tanta gen.
		Don prec l’omnipoten
	35	Qu’ira e dolor totztemps lor don en feu,
		Si los preisons non desliuran en breu.
IV		E car est faitz s’es cargatz
		D’angoissos desplazer,
		Tant nom dei astener
	40	C’alques noi sia nomatz
		Cel qui l’ac en poder
		Elh fetz tal fin aver
		On non ac ges volontat
		Que fosson desliurat
	45	Li las preisonier dolen,
		C’ab semblan solamen
		C’agues tengut lur remaner per greu,
		D’ambas las partz los agr’ autz a leu.
V		Ai, reis frances, pois vos platz
	50	Metr’ en dieu mantener
		Cor e cors et aver
		Tant que n’etz per totz lausatz,
		Cum poc tals faitz caber
		En vostre captener ?
	55	Mout avetz pretz oblidat.
		Mas dieus per sa pidat
		En oblidal vengamen,
		Qu’estiers crei fermamen
		Qu’est passatges de l’autre segral treu,
	60	Si nous en fai la denha crotz manleu.
VI		Honors de crestiantat,
		Dieus vos don volontat
		Que fassatz esmendamen
		Qu’eslonhe del turmen
	65	Los las, qu’estiers en morrant tuich en breu,
		Car sol ab precs o podetz far mout leu.
VII		Anz qu’ajal chan affinat,
		Dieus en al rei jutgat
		A mort et a greu turmen
	70	Sai e lai mainta gen ;
		Don tanh que pens de far l’esmenda en breu
		Lo novels reis per s’onor e per deu.