Levy, Emil. Der Troubadour Bertolome Zorzi. Halle: Max Niemeyer, 1883.

Code: 074,009 Auteur: Bertolome Zorzi Genre: Canso Numero: IX

Mout fai sobrieira folia

I	1	Mout fai sobrieira folia
		Qui ditz fol d’En Peire Vidal,
		Car senes gran sen natural
		Sos motz dir hom non sabria.
	5	E d’aisso m’es garentia :
		Quand hom es en autrui poder,
		Non pot totz sos talans complir,
		Anz l’aven sovens a giquir
		Per l’autrui grat lo sieu voler.
II	10	Mas per o ges non diria
		Qu’ieu non conogues ben de mal
		E qu’ieu non tengues per venal
		Tot home c’autr’ en creiria ;
		Ni nois tanh qu’ieu plus en dia,
	15	Car qui vol al segle caber,
		Maintas vetz l’aven a sofrir
		So quelh desplatz ab gen cobrir
		Per semblansa de non-caler.
III		E si plus direm tanhia,
	20	Ben ausera dir quem desval,
		C’adreich m’a trobat e lejal
		Tals qu’apensar si deuria
		Qu’ieu pogra dir ses bausia :
		Tant ai de sen e de saber
	25	Que del tot sai mon mielh chauzir
		E gen conoisser e grazir
		Quim sap honrar ni car tener.
IV		E car tant a de feunia
		Qu’a celz cui deu valer non val,
	30	On plus en aurial logal
		Que pogues e nolh nozia,
		Gaire valer non volria.
		Mas qui pot e non vol valer,
		Cum non s’esforsa de morir,
	35	Des que la mortz nol denha aucir
		Per far enoi e desplazer ?
V		Huoimais fastics mi seria
		Coblejars d’aisso que nom cal,
		Qu’en lonc plaich avol deslejal
	40	Nois tanh c’adreitz hom estia.
		Don volh segre autre via,
		C’onor e pretz vuolh mantener
		E bonas dompnas obedir
		Et a cortesa gen servir
	45	E non ai gran cura d’aver.
VI		Doussa res, dir nous sabria
		Cum vos port fin’ amor coral
		Ni cum sont faich trist miei jornal
		Pois nous vi cum far solia.
	50	Qu’ieu sai aisso, on qu’ieu sia,
		Bella dompna, dieu cuich vezer,
		Quand lo vostre gen cors remir ;
		E car tant vos am e desir,
		Grans bens m’en deuria escazer.
VII	55	E non per tant sis faria,
		S’acsetz chausit lo dol mortal
		Qu’el cor m’intret sobrel portal
		Qu’ieus dis : A dieu, doussa amia !
		C’ab l’amor quem destrenhia,
	60	Dompna, quand vos vi remaner
		Ni m’avenc de vos a partir,
		Tant m’angoisseron li sospir
		C’a pauc no m’en venc a cazer.
VIII		E mon dimei chant fatz saber
	65	C'om deu ben son sen descobrir,
		Mas grans sciensa es sen cobrir,
		Lai on non-sens pot plus valer.