Levy, Emil. Der Troubadour Bertolome Zorzi. Halle: Max Niemeyer, 1883.

Code: 074,013 Auteur: Bertolome Zorzi Genre: Canso Numero: XIII

Puois ieu mi fenh mest los prims entendenz

I	1	Puois ieu mi fenh mest los prims entendenz
		Saber un chant primamenz afinar,
		Be tanh quem pes ab prim vers demostrar,
		S’ieu en sui prims ni sai esser valhenz ;
	5	Quar primeza es mostrar son saber
		E primamenz sa folia cubrir,
		Pero nulhs hom nos pot per prim chauzir,
		Si primamenz non sap far son dever.
II		Per qu’eu volh dir primers per mon dever,
	10	Con primamenz m’a faig amors chauzir,
		Quar nos fai tan prima domna cubrir ;
		Qu’en leis a sen, beutat e prim saber,
		Tant quel plus prim’ ab leis non par valhenz.
		E com eu l’am primamenz vuelh mostrar,
	15	Qu’om nos pot plus primamenz afinar,
		Com al primer li sui fis entendenz.
III		Qu’autra non es prima ni entendenz
		Qu’ab sim pogues ab primes’ afinar
		Per nulh prim faig ni per senblan mostrar,
	20	Si m’a lauzat sos prims valers valhenz
		E sa beutatz, qu’om prims non pot saber
		Que de prim pretz non l’entenda cubrir ;
		Pero prim pretz non pot hom tan chauzir
		Qu’assatz plus prims non tanh’ al seu dever.
IV	25	Qu’el mon non ha prim lau, so sai de ver,
		Qu’en leis plus prims non si puosca chauzir,
		Qu’il si sap gen com prim’ a luec cubrir
		E demostrar primamenz son saber,
		Et es tan pros prim’ e bel’ . . . . . . .
	30	. . . . . . . . . . . . . . . . . . . . . . . . . . . .
		. . . . . . cors prims nos pogr’ afinar
		Ni sos prims senz esser plus entendenz.
V		E car tan prims non sui ni entendenz
		Qu’en tot saupes sos prims laus afinar,
	35	Dirai qu’al prim qu’astres lam volc mostrar,
		Qu’el cor mi mes prim foc amors valhenz,
		Qu’o sobret gen elh det tan prim saber
		Qu’ades quom prims s’anet sotz leis cubrir,
		E car la saup prim’ e bella chauzir,
	40	En fetz com fis primamenz son dever.
VI		Qu’en tan prim vol me laisset de dever
		Tot primamenz son coratge chauzir
		E quelh desplai ab primeza cubrir
		E primamenz so quelh plai far saber,
	45	Qu’en fora prims, s’o chauzis, e valhenz,
		Quel prims volers mi feira gen mostrar,
		Qu’en far son joi primamenz afinar
		Non tem morir ; tan sui prims entendenz.
VII		Hai ! belz cors prims, chauzitz pels entendenz,
	50	On totz prims aibs volc natur’ afinar,
		Si ben nous quier, dregz vos fai prim mostrar
		Quem valhatz, pois tan es prims e valhenz,
		Quar primeza fai als adregz saber
		Qu’om primamenz nos pot d’onor cubrir,
	55	S’a cels cui sap en s’amor prims chauzir
		Non val, com tanh primamenz al dever.
VIII		Als entendenz fai mon prim vers saber,
		Qu’om l’afinar non deu als prims cubrir,
		Nil pot mostrar primamenz ses chauzir
	60	Leis don sui prims e valhenz al dever.