Appel, Carl. Das Leben und die Lieder des trobadors Peire Rogier. Berlin: Druck und Verlag von G. Reimer, 1882.

Code: 356,001 Auteur: Peire Rogier Genre: Vers Numero: 1

Al pareyssen de las flors

I	1	Al pareyssen de las flors,
		quan l’albre·s cargon de fuelh,
		e·l tempz gens’ ab la uerdura
		per l’erba, que creys e nays :
	5	doncx es a selhs bon’ amors,
		qui l’an em-patz ses rancura,
		q’us ues l’autre non s’erguelha.
II		Bos drutz non deu creir’ auctors
		ni so que ueiran sey huelh
	10	de neguna forfaitura,
		don sap que sa dona·l trays ;
		so que ditz qu’a fait alhors,
		creza, si tot non lo iura,
		e-sse que·n ui dezacuelha.
III	15	Qu’ieu uei de totz los melhors
		qui senpr’ en deuenon fuelh,
		qu’enqueron tan lur dreytura
		tro que lur dompna·s n’irays.
		e·l ris torna·ls pueys en plors ;
	20	e·l folhs per mal’ auentura
		uai queren lo mal que·l duelha.
IV		Qu’amors uol tals amadors,
		que sapchon sufrir erguelh
		en patz e gran desmezura ;
	25	si tot lor dompna·ls sostrays,
		paucs plagz lur en sia honors,
		quar si·l sap mal ni·s atura,
		ylh querra tost qui l’acuelha.
V		Per aquest sen suy ieu sors
	30	et ai d’amor tan quan uuelh,
		quar s’elha·m fay gran laidura,
		quant autre·s planh, ieu m’apays.
		si tot s’es grans ma dolors,
		sofier tro qu’elha·m melhura
	35	ab un plazer qual que·s uuelha.
VI		Mais uuelh trenta dezonors
		q’un’onor, si lieys mi tuelh,
		qu’ieu suy hom d’aital natura,
		no uuelh l’onor que·l pro lays.
	40	ni ges no·m laissa·l paors,
		don mos cors non s’asegura,
		qu’ades cug qu’autre la·m tuelha.
VII		De mon dan prec mos senhors,
		mas l’amor de midons uuelh,
	45	e que·l prenda de mi cura,
		que trop es grans mos esmays.
		molt mi fera gen secors,
		s’una uetz ab nueg escura
		mi mezes lai, o·s despuelha.
VIII	50	Peir Rogiers li quier secors,
		e si·l mals longueitz li dura,
		pauc uiura, qu’ades rauguelha.