Appel, Carl. Das Leben und die Lieder des trobadors Peire Rogier. Berlin: Druck und Verlag von G. Reimer, 1882.

Code: 356,006 Auteur: Peire Rogier Genre: Vers Numero: 3

Per far esbaudir mos uezis

I	1	Per far esbaudir mos uezis,
		que·s fan irat quar ieu no chan,
		no mudarai deserenan,
		qu’ieu no despley
	5	un so nouelh, que·ls esbaudey ;
		e chant mais per mon Tort-n’auetz,
		quar trop dechai
		tot quan uey sai,
		mas lai ab lieys creys ioys e pretz,
	10	per que·l sieus conortz m’es plus bos
		que tot quan uey far entre nos.
II		De midons ai lo guap e·l ris
		e suy fols, si plus li deman,
		ans dey auer gran ioy d’aitan ;
	15	a dieu m’autrey —
		non ai donc pro, quar sol la uey ? —
		del uezer suy ieu bautz e letz,
		plus no m’eschai,
		que ben o say,
	20	mas d’aitan n’ai ieu ioy e pretz
		e m’en fauc ricautz a sazos
		a guiza de paubr’ergulhos.
III		De totz drutz suy ieu lo plus fis,
		qu’a midons no dic re ni man
	25	ni·l quier gen fait ni bel semblan;
		cum qu’ilh m’estey,
		sos drutz suy et ab lieys dompney
		totz celatz e cubertz e quetz,
		qu’ilh no sap lay
	30	lo ben que·m fai,
		ni cum ai per lieys ioy e pretz ;
		ni·s tanh que ia·l sapch’ enuios,
		qu’ieu suy sai sos drutz en rescos.
IV		Anc ieu ni autre no·lh o dis,
	35	ni elha non saup mon talan,
		mas a celat l’am atretan —
		fe qu’ieu li dey —
		cum s’agues fait son drut de mey ;
		re no·m qual, que ia l’am eis setz —
	40	doncs amarai
		so qu’ieu non ai ? —
		oc, qu’eyssamen n’ay ioy e pretz
		e son alegres e ioyos,
		quant res non es, cum si uers fos.
V	45	Per s’amor uiu, e se·n moris,
		qu’om disses qu’ieu fos mortz aman,
		fait m’agr’amors honor tan gran,
		qu’ieu say e crey
		qu’anc a nulh drut maior non fey ;
	50	vos jutgatz, dompna, e destrenhetz !
		car s’ieu m’esmay
		e si mal tray
		ni muer per uos, ioys m’es e pretz :
		de uos m’es totz mals bes, dans pros,
	55	foldatz sens, tortz dregz e razos.
VI		Ieu mai que mai
		ma donn’ ieu sai
		que uos mi donatz ioy e pretz ;
		e uuelh mais morir ad estros
	60	ia·l sapcha negus hom mas uos.
VII		Bastart, tu uay
		e porta·m lay
		mon sonet a mon Tort-n’auetz;
		e di·m a n’Aimeric lo tos
	65	membre·lh dont es e sia pros.