Appel, Carl. Das Leben und die Lieder des trobadors Peire Rogier. Berlin: Druck und Verlag von G. Reimer, 1882.

Code: 356,005 Auteur: Peire Rogier Genre: Vers Numero: 4

Non sai don chant, e chantars plagra·m fort

I	1	Non sai don chant, e chantars plagra·m fort,
		si saubes don, mas de re no·m sent be,
		et es greus chans, quant hom no sap de que ; —
		mas adoncx par qu’om a natural sen,
	5	quan sap son dan ab gen passar suffrir,
		quar no·s deu hom per ben trop esiauzir,
		ni ia per mal hom trop no·s desesper. —
II		Mas tot quant es s’aclina uas la mort,
		que prezas tu tot quan fas ? ieu no re ; —
	10	mas so ditz hom, qu’auols es qui·s recre,
		per qu’om deu far tan gen contenemen,
		que no·l puesc’ hom mal dir ni escarnir ;
		per so dic ieu que no·s deu hom giquir
		aissi del tot, qui·l segle uol tener.
III	15	Fort estai be qu’om chant e que·s deport. —
		oc, quan n’es luecx ni temps que s’esdeue. —
		e quoras doncx ? uols o dir ges per me ? —
		sapchas qu’ieu hoc, quar us grans dols m’en pren,
		quar ditz totz iorns que rir uols e bordir,
	20	tol te d’aisso, ia t’er tost a morir. —
		e laissarai per so mon ioy-auer ?
IV		Si ioy non ai, don aurai doncx confort ? —
		e qual ioy quiers ? — de lieys cuy clam merce. —
		folhs yest. — per que ? — per dieu, trebalhas te,
	25	ni per aquo . . . — fai doncx ! — mas per nien
		te·n entremetz. — tu que saps ? — aug lo dir. —
		saps tu que ? — fai ! — laissa me tot guerir. —
		ieu uoluntiers, e fai tot ton plazer. —
V		Tost uenra temps, que conostra son tort. —
	30	aqui t’aten. — si fatz ieu per ma fe. —
		fas ton talan, mas ieu non cug ni cre
		tan quan uiuras n’ayas nulh iauzimen. —
		non dis, per als, mas quar m’en uols partir. —
		ieu hoc, per so quar no t’en uey iauzir. —
	35	e ia saps tu qu’als non ai en poder.
VI		Mos cors no·m ditz qu’ieu ab autra m’acort. —
		quar ben as dreg pel gran ben, que t’en ue. —
		el’ o fara. — e quoras ? — erasse. —
		ben estara si uers es, mas si·t men,
	40	tu que·n faras ? — am mai lo sieu mentir
		qu’autra uertat. — mal hi saubist cauzir,
		qu’ieu non pretz ren mesorgua contra uer.
VII		Per s’amor uiu, e s’amors m’a estort
		de la preizon, e s’amors m’a mes fre,
	45	que no·m eslays uas autra, si·m rete ;
		e per s’amor ai tot mon cor iauzen,
		e·m part d’enueg, e·m platz quan puesc seruir,
		e ualon mais de lieys li lonc dezir
		que s’auia d’autra tot mon uoler.
VIII	50	Lo uers tramet e uuelh que si prezen
		mon Tort-n’auetz, si·l play que·l denh auzir,
		que totz lo mons li deuri’ obezir,
		quar mai que tot uol bon pretz mantener.
IX		E si dons Santz m’a fag descauzimen,
	55	mieus es lo dans et er lo·m a sofrir,
		et el no·s poc de plus enuilanir,
		e per uilan lo deu hom ben tener.