Longobardi, Monica. I vers del trovatore Guiraut Riquier. "Studi Mediolatini e Volgari", 29 (1982-1983), pp. 17-163.

Code: 248,069 Auteur: Guiraut Riquier Genre: Vers Numero: XV

Qui·s tolgues

		LO XVI VERS D'EN GR. RIQUIER, FACH EN L'AN MCCLXXXIIII, EN JENOVIER.
I		Qui·s tolgues
		e·s tengues
		dels mals en que cossen,
		e fezes
	5	totz los bes
		que conoys ez enten,
		res non es
		que nogues
		d'anar a salvamen
	10	als repres
		on la fes
		es de Dieu, que·ns aten
		qu'a bon port nos traisses,
		sa merce prometen.
II	15	Prometen
		don valen
		trobam Dieu tan cortes,
		que fazen
		e dizen
	20	so que crezem que ·l pes,
		que·ns defen
		a prezen,
		e sos mans non faym ges!
		No·ns car ven,
	25	ans, sufren
		espera que·ns agues
		penedens humilmen,
		quar nos fes e·ns conques.
III		Be·ns conques,
	30	quar mort pres
		per son poble dolen,
		que vengues,
		si·s volgues,
		a luy sals peneden;
	35	que·l paires
		premiers fes
		Adams un falhimen,
		don fon mes
		sos heres
	40	en yssilh mot cozen,
		tro que Dieus sa trames,
		qui·ns rezemet moren.
IV		Mas moren,
		mal viven,
	45	cazem totz jorns el bres,
		en que·ns pren
		desceben
		l'Enemicx de mals ples
		que·ns apren
	50	e·ns essen
		a son vol de ben des,
		don tot len
		al arden
		fuec nos mena espes;
	55	e selh que li conten
		es en Dieu ben apres.
V		Ben apres
		es, que res
		no·l falh, sel que·l desmen;
	60	quar sotzmes
		demanes
		es l'Enemicx ses sen,
		qu'a perpres
		totz mals ves,
	65	per que fug mantenen
		quan sos pes
		es entes
		e tengutz a nïen;
		e crey que Dieus endres
	70	aquelh afortimen.
VI		Quar mals es
		tant apres,
		volgutz, faitz per la gen,
		e tan pauc amatz bes,
	75	nos ten Dieus en turmen.
VII		Narbones
		es malmes
		e blasmatz per nonsen
		ez er pus, si merces
	80	de Dieu no· y val breumen.
VIII		Pus es grieus per un tres
		lo mals que hom no·l sen.