Vatteroni, Sergio. Le poesie del trovatore Johan Esteve. Pisa: Pacini, 1986.

Code: 266,003 Auteur: Joan Esteve Genre: Sirventes Numero: VII

Ara podem tug vezer

		SIRVENTES QUE FES JOHAN [E]STEVE EN L’AN MCCLXXXIIII.
I	1	Ara podem tug vezer
		quossi·n pren a sselh qu’enclau
		en si bauzia e frau
		que hom non deu mantener,
	5	quar si dechay ses fallensa
		qui·s cuj’ab enjan fromir,
		que ancse ai auzit dir
		qu’ab selh reman que·l comensa.
II		Tracios se fai parer
	10	que·l trachers eys la mentau,
		tan lo sec ver per esclau
		que no·l layssa remaner
		en loc, ni troba guirensa;
		e·l malvatz no pot fugir
	15	que, quan que tric, ses fallir
		deu venir a dechazensa.
III		Qui quez aya desplazer
		quar ieu reprenc non suau
		tot trachor, e qui que l’au,
	20	se fai deslials tener,
		e crey qu’es de la nayssensa
		del mal frug que sap trahir
		ab enjan ez ab mentir,
		e far d’amor malvolensa.
IV	25	Ges ieu no vuelh far saber
		per cuy esta talan fau;
		entendre·m pot leu qui m’au,
		que d’als dir non ai voler,
		quar selh que fetz la ofensa
	30	Dieus e·l mon l’a en azir;
		no m’en cal als esclarzir,
		que·ls nescis n’an conoissensa.
V		A penas me pot caber
		el cor lo joy que m’esjau,
	35	quar lo fals coratge brau
		que cujava dechazer
		selh quez a pretz e valensa,
		Dieus l’a fach d’aut bas venir,
		e·l malvestatz descobrir
	40	dont n’er mais en viltenensa.
VI		Trachor no·m pot far plazensa
		ni res que·m puesc’abelhir,
		ni aquels que n’aug ben dir,
		quar paron de la semensa.
VII	45	Sirventes, fai ses temensa
		al valen Guillem auzir
		de Lodeva qu’esjauzir
		me fai, quar sa valors gensa.