Soltau, Otto. Die Werke des Trobadors Blacatz. "Zeitschrift für romanische Philologie", 23 (1899), pp. 201-248.

Code: 098,001=097,010 Auteur: Bonafe , Blacatz Genre: Tenso Numero: V

Seign'en Blacatz, pos per tot vos faill barata

		Bonafe e seign’en Blacatz.
I	1	Seign’en Blacatz, pos per tot vos faill barata
		E si clam’a deu de vos genz hermitana,
		Tant es la riqeza granz q’a vos s’aplata
		Q’anc aiols non sai menet maior ufana.
	5	Tant vos guerreion guerrer
		Que ves Alms fuzon l’archer,
		E non a ren e·l charner,
		On sol aver maint qarter.
II		Bonafe, de·ls huoilz de·l front non as escata,
	10	E·l pels es veilz e chanutz e sembla lana.
		Ben aia qui·us guirlanda sus de la pata
		Lai on intravaz emblar per la forana !
		Vos lor cuidez far paner,
		Mas ill en feron destrier,
	15	Qe mort e reget’e fer,
		Ab Brunel l’albalestrer.
III		Seigner, vos non temez lop ni chat ni rata,
		Tant es la riqeza granz e sobeirana,
		Ni·l moiller non porta vert ni escarlata,
	20	Ainz li manges son mantel l’autra semana.
		Segur veigna qui ren qer !
		Qui lo mantel sa moiller
		Met en gage a maceller
		Ges nom part de chaitiver.
IV	25	Bonafe, per thoma·us pais hom de neu mata
		E·us met un estront e·l poing ben per milgrana
		E manga per lebr’e leissa, sol non glata,
		. . . . . . . . . . . . . . . . . . . . . . . . . . . .
		E·us pot hom far monester
	30	De forn o de formorer
		E donar per vin blanc uer
		E pis d’ega per sabrer.
V		Seingn’en Blacatz, aqist paz non cuiz s’abata
		Que soven solez anar a la lugana,
	35	E·ill sirven temon la corda e la lata.
		Maint molton vos an pissat per la capzana.
		Anc hermitan ni templer
		Non viron tant mal guerrer,
		E dison lor berbiger
	40	Q’om tant malament non qer.
VI		Bonafe, soven cunpisas ta zabata,
		Que ren non i pos vezer, orbach’ aurana.
		Maintas moscast’an passada la gargata,
		Qe·t fan la gorga curar e tenir sana.
	45	Mort ai maint orb escacher,
		Qant qeiron a cavaler,
		Mas qe fosson pautoner
		Ab baston et ab dobler.
VII		Seign’en Blacatz, qui re·us quier,
	50	Be·ill fan sofraicha dener,
		Car aveç de caitiver
		Mais d’un veill falcon lainer.
VIII		N’Orbach’, en vostre clocher
		Par que aia colunber
	55	O aion niat rater —
		Et eu sai donar, qui·m quer.