Soltau, Otto. Die Werke des Trobadors Blacatz. "Zeitschrift für romanische Philologie", 23 (1899), pp. 201-248.

Code: 233,005=097,009 Auteur: Guillem de Saint Gregori , Blacatz Genre: Tenso (Partimen) Numero: VII

Seigner Blacatz, de dompna pro

		Guillems de Saint Gregori et en Blacatz.
I	1	Seigner Blacatz, de dompna pro
		Bell’e plazen, senz cor vaire,
		D’aut parag’e de bon aire,
		Aurez toz bels plasers d’amor
	5	Senz far, o d’aitan gran ricor
		Vos retendra per drut baisan
		Sa donzella, e de mais re
		Non venz l’una l’autr’, e voill be
		Que prenaz a vostre talan.
II	10	Guillem, qi·m part, tota sazo
		Sai chauzir a·i meu veiaire
		Lo meillz, mais no·n sabez gaire,
		Quar partez plait de tal error
		A nuil fin leial amador,
	15	Per q’eu la donzella·us soan.
		Pos ma bella domna·m mante
		Ab bels plazers ges no·m conve
		Q’eu an ad autra part preian.
III		Seigner Blacatz, molt mi sap bo
	20	Qar d’aizo m’es contrastaire,
		Q’eu voill mais d’un vercer traire
		Mais douz fruit qe fuoilla ni flor
		E mais d’ivern de fuoc chalor
		Que sol vis l’autre que·i resplan
	25	E mais d’amor aver iasc
		Fin ioi complit, de plazers ple,
		Que senz trobar anar cerchan.
IV		Guillem, de la vostra razo
		Non voill esser razonaire ;
	30	Que maint fruit pot penre laire
		Que non a tant dolza sabor,
		Qui·l pren bas con aut, ni douzor.
		Taing donc q’om sa domna desman ?
		Non ges ! q’eu l’am per bona fe,
	35	E s’ill en baisan me rete
		Non voill vostre fruit ni·l deman.
V		Seigner Blacatz, la tenzos an
		A’n Reforzat, que, si·s vol be,
		Juzara·l ver ; no voill cel re
	40	Ni cuebr’a·l iuzar son talan.
VI		Guillem, en Iaufre non soan ;
		Mais ma Bella-Capa cove
		Que iuze·l ver si cum per se,
		Si domnas ni donçellas fan.