Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,018 Auteur: Giraut de Bornelh Genre: Canso Numero: XLIX

Be deu en bona cort dir

I	1	Be deu en bona cort dir
		Bo sonet qui·l fai,
		Per qu’eu retrairai
		Un levet e qui l’apren,
	5	Parra d’ome no-chalen;
		C’aissi com si no·m chalia,
		Fatz leugers sonetz,
		Per que·l plus greus semblans sia
		Leus e bos afaire.
II	10	Mas un petit volh gequir
		E si falhirai?
		So don chantarai,
		Pos que·lh rei entre lor gen
		An pres tal acordamen!
	15	Bo·m sap que d’esta paria
		Seg’als Mors esfretz
		E cilh n’aion manentia
		Cui n’er mal a traire.
III		E Deus los en lais jauzir,
	20	Qu’eu m’entremetrai
		D’aisso que m’eschai;
		Que no m’azaut de trop sen
		N’en trop foldat no m’enten.
		Pero sens, pretz e folia
	25	Chascus a sas vetz,
		Qui be·ls assembla ni·ls tria,
		Segon mo veiaire.
IV		Mas en sonh volh reverdir
		Que·m te trist e gai;
	30	Que tot ensems n’ai,
		Ir’e joi e marrimen
		Que·m fai sospirar soven.
		Don no dezir companhia,
		Si be·m vauc soletz;
	35	Ans sai que be m’estaria,
		S’er’amatz amaire.
V		Ab so que desovenir
		Me deuria sai
		L’amistatz de lai!
	40	Per que? Car tot eissamen
		Sai m’agrat. E de qu’i men?
		Er dic so que tem m’aucia
		Com fols, car me letz!
		Per re no·m chastiaria,
	45	Tro qu’en torn a braire.
VI		Greu m’i tengra de falhir,
		Mas eu recebrai
		Segon que metrai.
		Bon es qu’eu eis me repren,
	50	Can ai dich gran falhimen;
		Pero si·s n’apercebria
		Be petitz tozetz;
		Mas eu menti, tan volria
		Plazer fors mon aire!
VII	55	Ni ja per adrech mentir
		Midons no perdrai!
		C’ai dich? Ben estai?
		C’ades vauc mo tort creissen,
		No·i a trop de fenhemen,
	60	S’eu dic que no la perdria;
		Vos vos chalaretz,
		Na Parlera-Boch’, un dia,
		Fe que dei mo paire!
VIII		Bel’amia, plus querria
	65	Que·m consentissetz
		Quez un jorn vos clames mia
		C’Arle ni Belcaire!
IX		Ja mo Joios no·m veiria
		Ni m’o veirai gaire?