Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,019 Auteur: Giraut de Bornelh Genre: Canso Numero: L

Be for' oimais drechs el tems gen

I	1	Be for’ oimais drechs el tems gen,
		Pos la brav’aur’e·l frechs s’en vai,
		C’ab l’acors del termini gai
		Jovens, qu’es demechs mortz, cobres
	5	E c’om l’acolhis e l’onres;
		Que si jois mor, gran dol en ai,
		Can vei c’ab folha ni per flor
		No sortz ni cobr’ en sa valor,
		E car s’esdui fians’e fes
	10	E cortz e bes,
		Per pauc en l’ira que m’en ve
		Totz fachs de solatz no·m rete.
II		Mas ges a mo cor non aten
		Tan com auch precs c’us quecs m’en fai.
	15	C’anc mais o d’abril o de mai
		No fo que l’us no m’alegres;
		Era m’es chascus plus engres!
		E pero si·m conortarai
		Ses alegrer e ses amor
	20	E no cut sapchatz chantador
		Que d’aital plach s’entremezes.
		E donc com es
		Qu’eu ses joi cut chantar e be
		Que totz bos chans sofr’e soste?
III	25	No pot esser, que ben o sen;
		Ans que m’en fenha no s’eschai!
		Ja ses joi be no chantarai;
		Qu’enquera no cut c’om chantes
		Ses amor qu’el cor no·lh mostres
	30	So que pois forses sen ab jai.
		Pero  ‚trobar‘ e  ‚trobador‘
		Sonon de diversa color,
		Que tals cud’ esser ben apres
		Que no sap ges
	35	Com egals chauzimens conve
		Vas desmezur’e vas merce.
IV		Car ges segon lo chauzimen
		Trobars no leva ni dechai,
		Mas als francs coratges s’atrai
	40	Lo drechs sens e·l bos dichs apres;
		Car qui per mo bo dir m’ames,
		Tot distra·lh que dich non aurai.
		C’ades a la bona sabor
		Serf la leng’al cor e l’acor
	45	E ren dels bes bonas merces
		E del mal pres
		Mals gratz tot aissi com l’ave;
		Que si·m fer’eu vos e vos me.
V		Vos sabetz ab cal jauzimen
	50	Foron amic fin e verai;
		Mas er’es tornad’en afrai
		Bon’amors, com que comenses,
		E cudava que·s melhures,
		Mas ja mais non o cudarai;
	55	C’una mal’enfruneza cor,
		Don domnas e lor amador
		Son ochaizonat e mespres
		Que, si·m legues,
		Eu eis cut qu’en distra tal re
	60	Qu’enemics li fora jasse.
VI		Car no quer drech de falhimen,
		Ai cen vetz perdut e perdrai,
		Ja pos non ai dich ni dirai
		So don cela s’endrechures,
	65	Qui m’a·l tort e lo m’ac ades!
		Per qu’eu so cre: no·m lauzarai
		De leis, c’ades la trop peior
		Plus que sers fai de mal senhor;
		Can l’a servit dos ans o tres
	70	E, desc’a mes
		Tot so que pot, lui no·n sove,
		No l’ama ni·l preza ni·l cre.
VII		E si no fos? Que vauc temen?
		Per so m’estortz, car m’en estrai!
	75	Ja, si Deus me do tornar sai,
		No·m fora pros, si·lh demandes
		Merce, per so que la·i trobes?
		Empero si·lh perdonarai
		Clamans e com a mal deutor
	80	C’om eschaen a trop melhor;
		Que·m valgra molt, s’ a Deu plagues,
		Qu’ela·m parces
		Tans tortz com eu l’ai fach ancse,
		Don ges enquera no·m recre.
VIII	85	E si lai on fo mortz o pres
		Me conduisses,
		Sobre totz eu virera·l fre
		Vas lo senhor de Sanh-Sere.
IX		Qu’entrels Espas vai jois e ve
	90	E·i guid’e·i chabdel’e·i chapte.