Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,080 Auteur: Giraut de Bornelh Genre: Devinaill Numero: LIII

Un sonet fatz malvatz e bo

I	1	Un sonet fatz malvatz e bo
		E re no sai de cal razo
		Ni de cui ni com ni per que
		Ni re no sai don me sove
	5	E farai lo, pos no·l sai far,
		E chan lo qui no·l sap chantar!
II		Mal ai, c’anc om plus sas no fo,
		E tenh malvatz ome per pro
		E don assatz, can non ai re,
	10	E volh mal celui que·m vol be;
		Tan sui fis amics ses amar
		C’ancse·m pert qui·m vol gazanhar.
III		Ab celui vauc que no·m somo
		E quer li, can non a que·m do.
	15	Per benestar sui ab Jaufre,
		C’aissi sai far so que·m conve
		Qu’eu·m leu, can me degra colgar,
		E chan d’aco don dei plorar.
IV		Detorn me vai e deviro
	20	Foldatz, que mais sai de Cato.
		Devas la coa·lh vir lo fre,
		S’altre plus fols no m’en rete;
		C’aital sen me fi ensenhar
		Al prim qu’era·m fai foleiar.
V	25	Drutz ai estat una sazo
		Senes engan ab traïzo.
		Ab orgolh ai clamat merce
		A l’altrui obs si com per me
		Qu’estra mo grat cut achabar
	30	E quer so que no·m volh donar.
VI		Domna sai, ja no volh que·m so
		Ni, si·m fai mal,  que lo·m perdo.
		Si·s volia colgar ab me,
		A pauc no vos jur per ma fe
	35	Que pro m’en faria preiar;
		Mas no·n deu om trop soanar!
VII		Si·m fezes ben, en gazardo
		Eu sai be trobar ochaizo
		Per que·l servizis s’i recre.
	40	Mas so d’aquels derrers s’emple,
		Per malvestat cudan levar
		E mais valer per sordeiar.
VIII		No sai de que m’ai fach chanso
		Ni com, s’altre no m’o despo;
	45	Que tan fol a saber m’ave,
		Re no conosc que m’aperte.
		Cela m’a fach oltracudar
		Que no·m vol amic apelar!
IX		Eu cut chauzidamen parlar
	50	E dic so que·m fai agachar.
X		Ela·m pot en mo sen tornar,
		Si·m denhava tener en char.