Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 389,010a=242,014 Auteur: Raimbaut d'Aurenga , Giraut de Bornelh Genre: Tenso Numero: LVIII

Era·m platz, Giraut de Bornelh

I	1	‚Era·m platz, Giraut de Bornelh,
		Qua sapcha per c’anatz blasman
		Trobar clus ni per cal semblan.
		Aisso·m diatz
	5	Si tan prezatz
		So que vas totz es comunal;
		Car adonc tuch seran egal.‘
II		„Senher Linhaure, no·m corelh,
		Si quecs se trob’a so talan;
	10	Mas me eis volh jutjar d’aitan
		Qu’es mais amatz
		Chans e prezatz,
		Qui·l fai levet e venansal,
		E vos no m’o tornetz a mal!“
III	15	‚Giraut, no volh qu’en tal trepelh
		Torn mos trobars quez om am tan
		L’avol co·l bon e·l pauc co·l gran.
		Ja per los fatz
		Non er lauzatz;
	20	Car no conoisson ni lor chal
		So que plus char es ni mais val.‘
IV		„Linhaure, si per aisso velh
		Ni mo sojorn torn en afan,
		Sembla que·m dopte de mazan!
	25	A que trobatz,
		Si no vos platz
		C’ades o sapchon tal e cal?
		Que chans no port’altre chaptal.“
V		‚Giraut, sol que·l melhs aparelh
	30	E di’ades e trai’enan,
		Me no chal, si tan no s’espan;
		C’anc grans viltatz
		No fo denhtatz;
		Per so prez’om mais aur que sal
	35	E de chan es tot atretal.‘
VI		„Linhaure, fort de bo conselh
		Es fis amans contrarian;
		E pero, si·m val mais d’afan
		Mos sos levatz,
	40	C’us enraumatz
		Lo·m dezagens ni·m dia mal
		A cui om no·n deia censal!“
VII		‚Giraut, per cel ni per solelh
		Ni per la clardat, que resplan,
	45	No sai de que·ns anem parlan
		Ni don fui natz;
		Si sui torbatz,
		Tan pres d’un fi joi natural!
		Can d’als consir, no m’es coral.‘
VIII	50	„Linhaure, si·m vira·l vermelh
		De l’escut cela cui reblan
		Que volh dir: «A Deu me coman!»
		Cals fols pensatz
		Oltracudatz
	55	Me trais doptansa desleial!
		No·m sove com me fetz comtal?“
IX		‚Giraut, greu m’es, per Sanh Marsal,
		Car vos n’anatz de sai nadal.‘
X		„Linhaure, que vas cort reial
	60	M’en vauc ades rich’e chabal.“