Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,067 Auteur: Giraut de Bornelh Genre: Vers Numero: LXII

S'es chantars ben entendutz

I	1	S’es chantars ben entendutz
		E s’ofris pretz e valor,
		Per qu’es lach de trobador,
		Desque sos chans er saubutz,
	5	Qu’el eis en sia lauzaire?
		Que be pareis al retraire
		Si·lh n’eschai blasmes o laus.
II		E bos pretz reconogutz
		Dur’ades d’una color,
	10	Si·l senher gara com cor;
		C’aissi sera greu vencutz.
		E qui fort es rabinaire,
		No sap ni no·s pot estraire
		C’ans termini no repaus.
III	15	E bon’amistatz de drutz,
		Qui la noiris ab temor,
		Fai bo fruch e bona flor,
		Can chascu n’eschai salutz;
		E no·us aizinetz gabaire,
	20	Si ja re fatz fis amaire,
		Ans conve francs e suaus.
IV		Qu’eu ai d’amadors vistz mutz,
		Pois s’i feron gabador;
		Can guerra sors entre lor,
	25	Lo gabars es remazutz
		Escharnitz; sobregabaire,
		Dins defors so repaire,
		A peior perilh que naus.
V		Lo vers auzitz e mogutz
	30	Coma de bo trobador
		Pois reverti en error,
		Lo chans can er’asaubutz,
		C’us s’en fazia clamaire
		Dels dichs don altr’era laire,
	35	Com fetz de la gralha·l paus.
VI		Rics ja vitz dechazegutz,
		Pos foron larc donador,
		Car per agrei de folor
		Remania lor pretz nutz,
	40	E cui sens non es guidaire,
		No sap ni pot a chap traire,
		Ans par a la fi bertaus.
VII		Et eu que sai sui vengutz,
		Bos reis, per vostra valor
	45	E no·i mou a comtador,
		M’ais del vers, can er saubutz
		Vas lo vostr’enter veiaire;
		Car sai que·ns etz guitz e paire
		De pretz e tenetz las claus.
VIII	50	E creis vos ades vertutz,
		Cui que·s vir de drech en caire,
		E Deus, si·lh platz, la·us esclaire;
		Qu’e·us am servir e non aus!