Kolsen, Adolf. Sämtliche Lieder des Trobadors Giraut de Bornelh. Halle a. S.: Verlag von Max Niemeyer, 1910.

Code: 242,032 Auteur: Giraut de Bornelh Genre: Canso Numero: LXVIII

De bels dichs menutz frais

I	1	De bels dichs menutz frais
		Aver et escudar
		No cuder’eu trobar.
		Sobeiras ja fo l’ans!
	5	Per so·s passet mos chans
		En patz jostals alsors;
		E si·m fos er’onors
		D’eis lo trebalh cobrar,
		Trop volgra mais donar
	10	Mos gais sonetz joios
		Ab bels dichs et enters,
		Entendables e plas
		Que trop escurs ni sobrestorias.
II		E ja no·m for’empais
	15	D’eis regio tornar,
		S’eu cudes encontrar
		Belas mas no per gans.
		Mas falhitz es bobans
		E pretz e bon’amors
	20	E respechs de senhors
		D’acolhir e d’onrar!
		De que posc donc chantar?
		Que·l chan ja·l fai razos
		O·l noms es messongers,
	25	Qu’el tems dels ancias
		Jois, chans ensems eran co·lh palh’e·l gras.
III		Tans n’i vei d’els estrais
		Del bel galaubeiar
		Que no·m n’aus amparar.
	30	Per que? No m’o demans,
		Que savis est e grans;
		Que jois es en decors!
		No tanh neis als menors
		Tals res ademandar.
	35	Cui ves tu conortar,
		Tan sia gais ni pros?
		Pero mans chavalers
		Abaissa fachs vilas
		E torna·l nom desobre soteiras.
IV	40	De Bordel tro Lamais
		No·m volh plus esperar
		………………………
		C’ades m’es pretz. — Mas cans!
		Laissa·m, no·m platz mazans
	45	Senes razonadors;
		Tan es lo meschaps sors,
		No fai a razonar.
		Be·m posc meravilhar;
		Que sols nada·l peissos!
	50	En totz bos altz mesters
		M’aib aicel Rovinhas
		A be triar los brezilhatz dels sas.
V		Re no·m val us sols trais
		Al pas dezencombrar.
	55	Totz m’en cudei laissar;
		Mas venra l’Alamans,
		L’adrechs e·l benestans,
		Miralhs e guitz e flors
		D’altres emperadors,
	60	E creis per gran afar!
		Pois auziretz passar
		Per locs e per sazos
		Mals pas e mals senders
		Ties ab Chastelas
	65	De nom partitz e de conselh propdas.
VI		Tot salhira l’agais
		Que no·l posc plus celar,
		Per que pert alegrar;
		Que vei far don ve·l dans,
	70	Per que sui malanans!
		Car o trop els alsors
		Don cudei que fos sors
		De ben aconselhar,
		Tro que l’auzi bailar
	75	Contra me sos peos
		A tal que·m fo sobrers.
		No volh dir que trafas,
		Si tot, s’o fos, eu·m chalera per mas.
VII		No·m fatz de mans lor ais
	80	A be·mas taïnar,
		Can eu volh sermonar.
		C'auia, car sermonans
		Me bat, cel nofezans
		Qu'eu no volh refectors
	85	Ni reglas de colors;
		Car ja per sopleiar,
		Si' ab cor form e clar,
		Ni per trops chapairos
		No sera·l frair enters
	90	Ni verais ni certas,
		Si·l drech no sec e no·l guida la mas.